صدرِ مملکت آصف علی زرداری نے 8 ستمبر یومِ بحریہ کے موقع پر اپنے پیغام میں بحری فوج کے افسران اور جوانوں کی بہادری، قربانیوں اور خدمات کو خراجِ تحسین پیش کیا ہے۔
صدر نے کہا کہ 1965 کی جنگ میں پاک بحریہ نے جرات اور ہمت کی نئی تاریخ رقم کی۔ آپریشن سومناتھ دشمن کے لیے خوف اور پاک بحریہ کے لیے فخر کی علامت بن گیا۔ انہوں نے کہا کہ یومِ بحریہ اس عزم کی تجدید ہے کہ پاک بحریہ ہر محاذ پر قوم کا دفاع کرتی رہے گی۔
یہ بھی پڑھیے: پاک نیوی کی تیاری دیکھ کر دشمن کو آگے بڑھنے کی جرات نہیں ہوئی، وائس ایڈمرل رب نواز
آصف علی زرداری نے کہا کہ پاک بحریہ آج ایک جدید اور کثیرالجہتی فورس کے طور پر سامنے آئی ہے جو نہ صرف سمندری حدود کی حفاظت کر رہی ہے بلکہ تجارتی راستوں کے تحفظ اور عالمی امن مشنز میں بھی اہم کردار ادا کر رہی ہے۔
انہوں نے کہا کہ بُنیان المرصوص آپریشن کے دوران پاک بحریہ نے سمندری حدود کا تحفظ کرتے ہوئے دشمن کی کسی بھی ممکنہ جارحیت کو ناکام بنایا۔
صدر مملکت نے کہا کہ قوم کو اپنے شہداء اور غازیوں پر فخر ہے۔ یومِ بحریہ کے اس دن ہم اپنے شہدا کی لازوال قربانیوں کو سلام پیش کرتے ہیں۔
پاک بحریہ ملک کا محافظ اور تابناک مستقبل کا معمار ہے، وزیراعظم کا یومِ بحریہ پر پیغام
وزیراعظم محمد شہباز شریف نے 8 ستمبر یومِ بحریہ کے موقع پر پاک نیوی کے افسران، جوانوں اور اہلکاروں کو زبردست خراجِ تحسین پیش کیا ہے۔
وزیراعظم ہاؤس سے جاری بیان میں انہوں نے کہا کہ پاک بحریہ کی تاریخ بہادری اور قربانیوں کی لازوال داستانوں سے بھری ہوئی ہے جس میں 1965 کی جنگ کے دوران آپریشن سومناتھ ایک یادگار حیثیت رکھتا ہے۔
وزیراعظم نے کہا کہ اس آپریشن میں پاک بحریہ نے بھارتی ساحلی شہر دوارکا پر فیصلہ کن حملہ کر کے دشمن کا مواصلاتی نظام تباہ کیا جو نہ صرف بحریہ کی عملی صلاحیتوں کا مظاہرہ تھا بلکہ ملکی سالمیت کے غیر متزلزل عزم کا بھی ثبوت تھا۔ انہوں نے کہا کہ یہ معرکہ آج بھی بحری جوانوں کے دفاعِ وطن کے جذبے کو تازہ کرتا ہے۔
شہباز شریف نے کہا کہ 1965 کے بعد بھی پاک بحریہ نے بحیرہ عرب میں طاقت کے توازن کو برقرار رکھنے میں کلیدی کردار ادا کیا اور اپنی پیشہ ورانہ مہارت اور حکمت عملی سے پاکستان کے دفاع کو ناقابلِ تسخیر بنایا۔ انہوں نے حالیہ معرکہ حق کا ذکر کرتے ہوئے کہا کہ پاک بحریہ نے ایک بار پھر اپنی تیاری اور عزم کا عملی ثبوت فراہم کیا ہے اور واضح کر دیا ہے کہ پاکستان اپنی آبی سرحدوں کی حفاظت ہر قیمت پر کرنا جانتا ہے۔
یہ بھی پڑھیے: معرکہ حق میں کامیابی: صدر مملکت نے آرمی، ایئر فورس اور نیوی کے 488 افسران و جوانوں کو عسکری اعزازات سے نواز دیا
وزیراعظم نے کہا کہ پاک بحریہ نہ صرف جنگی محاذ پر بلکہ ملک کی آبی معیشت، بندرگاہوں کی ترقی، ساحلی کمیونٹیز کی فلاح و بہبود اور عالمی سطح پر مشترکہ مشقوں میں بھی نمایاں کردار ادا کر رہی ہے۔ انہوں نے کہا کہ آبی گزرگاہوں کے تحفظ اور قدرتی آفات میں امدادی خدمات نے پاکستان کی عزت و وقار میں اضافہ کیا ہے۔
آخر میں وزیراعظم شہباز شریف نے کہا کہ آج یومِ بحریہ کے موقع پر ہم اپنے ماضی اور موجودہ ہیروز کو سلام پیش کرتے ہیں۔ انہوں نے دعا کی کہ اللہ تعالیٰ پاک بحریہ، مسلح افواج اور ملک کو ترقی و خوشحالی اور کامیابی سے ہمکنار کرے۔
