ٹی 20 ایشیا کپ 2025 کے سب سے بڑے اور روایتی حریفوں بھارت اور پاکستان کے مابین ہونے والے اہم مقابلے کے لیے ٹکٹوں کی فروخت توقعات سے کہیں کم رہی ہے۔ یہ میچ 14 ستمبر کو دبئی میں ہونا ہے، لیکن میچ سے صرف 3 دن قبل بھی اس کے لیے ٹکٹوں کی فروخت میں خاصی سست روی دیکھی جارہی ہے۔
یہ بھی پڑھیں: ٹی20 ایشیا کپ: پاک بھارت میچ منسوخ کرنے کے لیے انڈین سپریم کورٹ میں درخواست دائر
بھارتی میڈیا کے مطابق منتظمین نے اس بار ایک سادہ اور آسان سنگل-ٹکٹ فارمیٹ متعارف کروایا تاکہ شائقین کو ٹکٹ حاصل کرنے میں سہولت ہو، لیکن اس کے باوجود مانگ میں وہ تیزی نہیں آئی جو عام طور پر پاک بھارت مقابلوں میں دیکھی جاتی ہے۔
ماضی میں ایسے میچز کے ٹکٹ چند منٹوں میں فروخت ہوجاتے تھے، جبکہ اس بار کئی نشستیں اب تک خالی ہیں۔
امارات کرکٹ بورڈ کے ایک اہلکار کہا کہنا ہے کہ اس بار شائقین کا ردعمل توقعات کے برعکس رہا۔ ان کا کہنا تھا ‘بھارت بمقابلہ پاکستان میچ کے لیے ٹکٹوں کی فروخت بہت کم ہے،اب تک صرف نچلے درجے کی نشستوں کی ٹکٹس فروخت ہوئی ہیں، جبکہ بالائی اور اعلیٰ درجے کی نشستیں تاحال دستیاب ہیں۔’
یہ بھی پڑھیں: ایشیا کپ: پاک بھارت میچ سے قبل اشتہاری نرخوں میں بے پناہ اضافہ
انہوں نے کہا کہ پچھلی بار چیمپیئنز ٹرافی میں ٹکٹ صرف 4 منٹ میں ختم ہوگئے تھے، لیکن اس بار جوش ہی نظر نہیں آرہا۔ اس کی ایک بڑی وجہ روہت شرما اور ویرات کوہلی کی غیر موجودگی ہوسکتی ہے۔
واضح رہے کہ روہت شرما اور ویرات کوہلی نے پچھلے سال بھارت کی جنوبی افریقہ کے خلاف ٹی20 ورلڈ کپ جیتنے کے بعد اس فارمیٹ سے ریٹائرمنٹ کا اعلان کیا تھا،ان دونوں سپر اسٹارز کی عدم موجودگی نے مداحوں کی دلچسپی کو متاثر کیا ہے۔
🚨 INDIA Vs PAKISTAN TICKETS STILL NOT SOLD OUT 🚨
– The tickets of India Vs Pakistan Match in this Asia Cup still not sold out. (TOI). pic.twitter.com/qsX3WTfBac
— Tanuj (@ImTanujSingh) September 10, 2025
دوسری جانب، سوشل میڈیا پر شائقین نے منتظمین سے شکایات کرتے ہوئے مطالبہ کیا ہے کہ میچ کے قریب مزید سنگل میچ ٹکٹ جاری کیے جائیں۔ بعض صارفین نے مہنگے ٹکٹ پیکیجز پر بھی تنقید کی ہے، جن کی قیمت 2 ٹکٹوں کے لیے 8 ہزار 300 درہم تک جاپہنچی ہے۔
یہ بھی پڑھیں: چیمپیئنز ٹرافی: پاک بھارت میچ انڈیا کی تاریخ میں سب سے زیادہ دیکھے جانے والا میچ قرار
اگرچہ ٹکٹوں کی فروخت میں مایوسی نظر آتی ہے، لیکن بھارت اور پاکستان کے درمیان تاریخی کرکٹ دشمنی اور نوجوان کھلاڑیوں کی آمد سے میچ کے حوالے سے تجسس اور جوش اب بھی باقی ہے۔
