وزیر مذہبی امور سردار محمد یوسف نے کہا ہے کہ عمرہ ایکٹ منظور ہو چکا ہے اور اس پر سختی سے عملدرآمد یقینی بنایا جائے گا تاکہ عازمین کو کسی طرح کی مشکلات کا سامنا نہ ہو۔
انہوں نے واضح کیا کہ حج اور عمرہ کاروباری یا تفریحی سفر نہیں بلکہ عبادت کا مقدس سفر ہیں، اور عازمین کو سعودی قوانین اور مقامی ضوابط کا احترام کرنا چاہیے۔
سردار محمد یوسف نے یہ بات تیسری پاکستان حج و عمرہ نمائش 2025 کی پری لانچنگ تقریب میں کہی۔ انہوں نے کہا کہ حج و عمرہ ایکسپو کے ذریعے ماسٹر ٹرینرز کی تربیت، اسلامی معیشت کے فروغ اور پاکستان کی سعودی عرب کے لیے برآمدات میں اضافہ ممکن ہوگا۔
مزید پڑھیں: تشدد اور دھمکانے کے کیس میں نامزد فرحان غنی کو عمرہ پر جانے کی اجازت مل گئی
نمائش 24 تا 26 اکتوبر 2025 کو پاک چائنا فرینڈشپ سینٹر اسلام آباد میں منعقد ہوگی، جس میں سعودی اور پاکستانی کمپنیوں کے علاوہ بینک، ایوی ایشن اور ٹیلی کام سیکٹر کے نمائندگان بھی شریک ہوں گے۔
تقریب میں یہ بات زور دے کر کہی گئی کہ حج و عمرہ انڈسٹری کی ترقی، مذہبی سیاحت کے فروغ اور برآمدات میں اضافے کے لیے یہ ایک اہم سنگِ میل ہے۔
