وفاقی وزیر اقتصادی امور احد چیمہ کی زیر صدارت ’آسان خدمت سینٹر‘ کے قیام کے حوالے سے اہم اجلاس منعقد ہوا۔ وزیراعظم کی ہدایات کے مطابق آذربائیجان کے ماڈل پر اسلام آباد میں پہلا ’آسان خدمت سینٹر‘ قائم کرنے کا فیصلہ کیا گیا۔
احد چیمہ نے اجلاس میں بتایا کہ کوشش ہوگی کہ اس سینٹر کا باقاعدہ افتتاح 90 روز کے اندر کیا جائے۔ اس موقع پر وزارت آئی ٹی، کیپیٹل ڈیولپمنٹ اتھارٹی (سی ڈی اے) سمیت دیگر متعلقہ اداروں نے تفصیلی بریفنگ پیش کی۔
انہوں نے کہا کہ ’آسان خدمت سینٹر‘ کے ذریعے شہریوں کو 100 سے زائد سروسز فراہم کی جائیں گی اور اس میں ایف بی آر، سی ڈی اے، اسلام آباد پولیس سمیت 10 سے زائد ڈیپارٹمنٹس شامل ہوں گے۔
مزید پڑھیں: اسلام آباد میں ’آسان خدمت مرکز‘ قائم کرنے کا فیصلہ، پاکستان اور آذربائیجان میں معاہدہ طے
وفاقی وزیر نے حکام کو ہدایت کی کہ وزارت خارجہ کی سروسز بھی اس سینٹر میں شامل کی جائیں تاکہ شہریوں کو تمام خدمات ایک ہی جگہ پر میسر ہوں۔
Minister for Economic Affairs Ahad Cheema has says first ASAN Khidmat Center will soon be inaugurated in Islamabad to revolutionize public service delivery in Pakistan#News #BreakingNews #RadioPakistan https://t.co/CVZh7jJNDW pic.twitter.com/Myls2UptyT
— Radio Pakistan (@RadioPakistan) September 12, 2025
احد چیمہ نے مزید کہا کہ آذربائیجان کی حکومت اس منصوبے میں مکمل تکنیکی معاونت فراہم کرے گی اور اسلام آباد میں پی ڈبلیو ڈی کی بلڈنگ میں اس سنٹر کو قائم کرنے کی تجویز زیر غور ہے۔
انہوں نے تمام متعلقہ محکموں کو ہدایت دی کہ آئندہ ہفتے تک حتمی تجاویز پیش کریں تاکہ منصوبے پر جلد از جلد کام شروع کیا جا سکے۔
وفاقی وزیر نے زور دیا کہ وزیراعظم کی واضح ہدایات ہیں کہ اس منصوبے میں کسی بھی صورت تاخیر نہ کی جائے، شہریوں کو بروقت اور معیاری خدمات فراہم کرنے کے لیے تمام محکمے فوری اقدامات کریں۔
