قومی اسمبلی میں اپوزیشن لیڈر راجا ریاض نے کہا ہے کہ عمران خان کے پجاریوں نے وہ کام کیا ہے جس سے ہمارے سر شرم سے جھک گئے ہیں، جس طرح ہمارے شہدا کی بے حرمتی کی گئی ہے اس پر عمران خان کو سرِعام پھانسی دینی چاہیے۔
قومی اسمبلی میں اظہارِ خیال کرتے ہوئے اپوزیشن لیڈر راجا ریاض نے کہا کہ آج پورا ہاؤس اور قوم شرمندہ ہے کہ جو کام آج تک انڈیا اور طالبان نہیں کرسکے، اسے فتنے و یہودی ایجنٹ عمران خان نے کر دکھایا۔ عمران خان اور اس کے پجاریوں نے وہ کام کیا ہے جس سے ہمارے سر ان شہدا کے سامنے شرم سے جھک گئے ہیں جن کی وجہ سے ہم آزادی کی سانسیں لے رہے ہیں۔
راجا ریاض نے کہا کہ جس طرح ہمارے شہدا کی بے حرمتی کی گئی ہے اس پر عمران خان کو سرِ عام پھانسی دینی چاہیے۔
اپوزیشن لیڈر کا مزید کہنا تھا کہ عدالتوں نے ذولفقار علی بھٹو، نواز شریف، اور محترمہ بے نظیر بھٹو کو کبھی یہ نہیں کہا جو عمران خان کو دیکھ کر کہا کہ ’ویلکم جناب ہمیں آپ کو دیکھ کر بڑی خوشی ہوئی‘۔
انہوں نے کہا کہ اگر ججوں کا عمران خان سے اتنا ہی لگاؤ ہے تو یہ سپریم کورٹ چھوڑ دیں اور پی ٹی آئی کے پلیٹ فارم سے کسی حلقے سے الیکشن لڑ کر پارٹی سے اپنی محبت پوری کرلیں۔
اپوزیشن لیڈر نے کہا کہ ہم نے کبھی نہیں سنا کہ کسی ملزم کو ریمانڈ میں ضمانت ملی ہو لیکن ریمانڈ کے دوران اس لاڈلے کو بڑی عزت و احترام کے ساتھ پولیس ریسٹ ہاؤس میں بھیجا گیا کہ جس سے مرضی ملو، سپریم کورٹ سے پولیس ریسٹ ہاؤس کے انچارج کو فون گیا کہ آج یہ لاڈلا ادھر ہے اسے کوئی تکلیف نہیں ہونی چاہیے۔
