چین کی عدالت نے 78 سالہ امریکی شہری جان شنگ وان لیونگ کے خلاف ملنے والے ٹھوس شواہد کی بنیاد پر ملکی قومی سلامتی کو نقصان پہنچانے اور دشمن ملک امریکا کے لیے جاسوسی کرنے پر عمر قید کی سزا سنائی ہے۔
عالمی خبر رساں ادارے ’سی این این‘ کے مطابق دہری شہریت کے حامل جان شنگ وان لیونگ، ہانگ کانگ کے مستقل رہائشی ہیں اور امریکی پاسپورٹ بھی رکھتے ہیں۔ ان کے خلاف امریکا کے لیے جاسوسی کرنے کے الزام میں 2021 میں تحقیقات کی گئی تھیں۔ تاہم یہ نہیں بتایا گیا کہ جان شنگ وان لیونگ کو کب گرفتار کیا گیا تھا اور انہیں قانونی چارہ جوئی کے لیے کیا مواقع اور سہولیات فراہم کی گئی تھیں۔ کیوںکہ چین میں حساس مقدمات کی بند کمرہ ٹرائل معمول کی بات ہے۔
یہ پہلا موقع نہیں جب چین نے جاسوسی کے الزام میں کسی کو سزا سنائی ہو۔ ایک ممتاز چینی صحافی کو فروری 2022 کو جاپانی سفارت کار کے ساتھ لنچ کرتے ہوئے حراست میں لے لیا گیا تھا۔ ان پر بھی جاسوسی کا الزام عائد کیا گیا ہے۔ اسی طرح 2019 میں چینی نژاد آسٹریلوی مصنف یانگ جون کو جاسوسی کے الزام میں گرفتار کیا گیا تھا۔
یاد رہے کہ چین ہانگ کانگ کو اپنا علاقہ تصور کرتا ہے اور اسے خصوصی انتظامی یونٹ کے طور پر چلاتا ہے تاہم مقامی آبادی خود کو خودمختار ریاست کے باسی کے کہتے ہیں۔
