دبئی میں کھیلے گئے ایشیا کپ کے سپر 4 مرحلے کے اہم میچ میں پاکستان نے بنگلہ دیش کو 11 رنز سے شکست دے کر فائنل میں جگہ بنا لی ہے، جہاں پاکستان اور بھارت پہلی بار ایشیا کپ کی تاریخ میں آمنے سامنے ہوں گے۔
یہ سپر 4 مرحلے میں پاکستان کی دوسری کامیابی ہے جس کے بعد بھارت کے خلاف ایونٹ میں تیسری بار ٹاکرا ہوگا، اس سے قبل دونوں ٹیموں کے درمیان ہونے والے میچز تنازع کا شکار رہے تھے، جہاں کھلاڑیوں نے ایک دوسرے سے ہاتھ ملانے سے گریز کیا۔
یہ بھی پڑھیں: بنگلہ دیش کو شکست دے کر پاکستان ایشیا کپ کے فائنل میں پہنچ گیا، 28 ستمبر کو بھارت سے مقابلہ ہوگا
جمعرات کی رات کھیلے گئے میچ کے بعد پاکستان کے کپتان سلمان آغا نے کہا کہ ان کی ٹیم بہت پرجوش ہے اور انہیں معلوم ہے کہ کیا کرنا ہے۔
’ہم اتنی اچھی ٹیم ہیں کہ کسی کو بھی ہرا سکتے ہیں۔ اتوار کو میدان میں اتریں گے اور بھارت کو شکست دینے کی کوشش کریں گے۔‘
اعداد و شمار کے مطابق بھارت اور پاکستان کی ٹیمیں اب تک 5 بار کسی بڑے بین الاقوامی ٹورنامنٹ کے فائنل میں آمنے سامنے آ چکی ہیں، جن میں سے بھارت نے 2 جبکہ پاکستان نے 3 بار کامیابی حاصل کی۔
مزید پڑھیں: آئندہ سیاسی گفتگو نہ کریں، آئی سی سی نے بھارتی کپتان سوریا کمار یادو کو خبردار کردیا
بھارت نے 1985 میں بینسن اینڈ ہیجز ورلڈ چیمپیئن شپ اور 2007 کے پہلے ٹی20 ورلڈ کپ کا فائنل جیتا تھا، پاکستان نے 1986 اور 1994 کے آسٹریلیشیا کپ کے فائنلز اور 2017 کی چیمپئنز ٹرافی کا فائنل جیتا۔
سپر 4 مرحلے کے اس اہم میچ میں بنگلہ دیش نے ٹاس جیت کر پہلے بولنگ کا فیصلہ کیا، پاکستان کی بیٹنگ لائن مشکلات کا شکار رہی اور پاکستان کو 20 اوورز میں محض 135 رنز کا مجموعہ حاصل کرنے میں کامیاب رہی۔
صاحبزادہ فرحان 4 رنز پر، جبکہ صائم ایوب ایونٹ میں چوتھی بار صفر پر آؤٹ ہوئے، فخر زمان نے 13 اور کپتان سلمان آغا نے 19 رنز بنائے۔
محمد حارث اور محمد نواز کی ساتویں وکٹ پر 38 رنز کی شراکت اہم ثابت ہوئی، حارث نے 2 چوکوں اور ایک چھکے کی مدد سے 31 رنز اسکور کیے جبکہ نواز نے 15 گیندوں پر 25 رنز بنائے جن میں 2 چھکے اور ایک چوکا بھی شامل تھا۔
ہدف کے تعاقب میں بنگلہ دیش کی ٹیم 20 اوورز میں 124 رنز بنا سکی، پاکستان کی جانب سے شاہین شاہ آفریدی نے شاندار بولنگ کرتے ہوئے 17 رنز کے عوض 3 وکٹیں حاصل کیں جبکہ حارث رؤف نے بھی 3 کھلاڑی آؤٹ کیے۔
مزید پڑھیں: شاہین آفریدی کے نام شاندار اعزاز، ایسا کرنے والے دنیا کے پہلے فاسٹ بولر بن گئے
بنگلہ دیش کے شمیم حسین نے 30 اور سیف حسن نے 18 رنز بنائے۔
شاہین شاہ آفریدی نے بیٹنگ میں بھی 13 گیندوں پر 19 رنز کی جارحانہ اننگز کھیلی جس میں 2 چھکے شامل تھے۔ انہیں بہترین آل راؤنڈ کارکردگی پر پلیئر آف دی میچ قرار دیا گیا۔
