پاک فوج کے شعبہ تعلقاتِ عامہ (آئی ایس پی آر) کے مطابق بلوچستان میں سیکیورٹی فورسز کے 2 علیحدہ انٹیلی جنس بیسڈ آپریشنز (IBOs) میں 13 دہشتگرد مارے گئے، جن کا تعلق بھارتی پراکسی تنظیموں فتنہ الخوارج اور فتنہ الہندستان سے تھا۔
ترجمان کے مطابق کوئٹہ ضلع میں 30 ستمبر کو خوارج کے ایک ٹھکانے کی اطلاع پر کارروائی کی گئی، جس دوران شدید فائرنگ کے تبادلے میں بھارتی سرپرست خوارج کے 10 دہشتگرد مارے گئے۔
مزید پڑھیں: بلوچستان میں امن کی کوششیں، ڈی جی آئی ایس پی آر کی طلبا سے گفتگو
اسی طرح یکم اکتوبر کو ضلع کیچ میں دہشتگردوں کے ایک ٹھکانے پر کارروائی کے دوران فتنہ الہندستان کے 3 دہشتگردوں کو ہلاک کر دیا گیا۔
آئی ایس پی آر کے مطابق دونوں آپریشنز میں بڑی مقدار میں اسلحہ، گولہ بارود اور بارودی مواد برآمد کیا گیا۔ مارے گئے دہشتگرد متعدد دہشتگردانہ کارروائیوں میں ملوث تھے۔
ترجمان نے مزید کہا کہ پاکستان کی سیکیورٹی فورسز بھارتی سرپرستی میں دہشتگردی کے خاتمے کے لیے پرعزم ہیں اور ملک دشمن عناصر کو انصاف کے کٹہرے میں لانے کے قومی عزم پر کوئی سمجھوتا نہیں کیا جائے گا۔
وزیراعظم کا کوئٹہ اور کیچ آپریشنز میں 13 دہشتگرد ہلاک کرنے پر سیکیورٹی فورسز کو خراجِ تحسین
وزیراعظم محمد شہباز شریف نے ضلع کوئٹہ اور ضلع کیچ میں فتنہ الہندوستان کے دہشتگردوں کے خلاف سیکیورٹی فورسز کی 2 کامیاب کارروائیوں پر خراجِ تحسین پیش کیا ہے۔
مزید پڑھیں: یوم استحصالِ کشمیر پر آئی ایس پی آر کا نیا نغمہ ’انسانوں کے جہاں میں‘ جاری
وزیراعظم نے کہا کہ ان آپریشنز میں 13 دہشتگردوں کو ہلاک کرنا سیکیورٹی فورسز کے عزم، بہادری اور قربانیوں کا منہ بولتا ثبوت ہے۔ ان کا کہنا تھا کہ جوان اپنی جان کی پرواہ کیے بغیر دہشتگردوں کے خلاف برسرپیکار ہیں اور ملک کے دفاع کو یقینی بنا رہے ہیں۔
وزیراعظم نے اس عزم کا اعادہ کیا کہ دہشتگردی کے خلاف جنگ میں پوری قوم اپنی سیکیورٹی فورسز کے شانہ بشانہ کھڑی ہے۔ ملک سے ہر قسم کی دہشتگردی کا مکمل خاتمہ کیا جائے گا اور امن و سلامتی کو یقینی بنایا جائے گا۔
