5 اگست یوم استحصالِ کشمیر کے موقع پر پاک فوج کے شعبہ تعلقات عامہ (آئی ایس پی آر) نے نیا نغمہ ’انسانوں کے جہاں میں‘ جاری کردیا ہے، جو مقبوضہ کشمیر میں جاری بھارتی مظالم کے خلاف ایک گونج دار پیغام ہے اور کشمیری عوام کی آزادی کی جدوجہد کو خراجِ تحسین پیش کرتا ہے۔
*یومِ استحصالِ کشمیر پر آئی ایس پی آر کا نیا نغمہ جاری*
آئی ایس پی آر کا نیا نغمہ کشمیر کی جدوجہدِ آزادی کو سلام اوربھارتی ظلم کے خلاف ایک گونج دار پیغام#dgispr #ispr #KashmirExploitationDay #5August pic.twitter.com/aE5V9wA3Lc— Seyam Musawar Abbasi (@seyammusawar) August 4, 2025
نغمے میں اس بات کو اجاگر کیا گیا ہے کہ کس طرح بھارتی ریاستی ظلم و ستم نے جنت نظیر وادی کشمیر کو شعلوں میں بدل دیا ہے۔ نغمے کے بول کشمیریوں کے اس عزم کی عکاسی کرتے ہیں جو وہ اپنے لہو سے حق کی داستان لکھتے ہوئے بھارتی تسلط سے آزادی حاصل کرنے کے لیے کررہے ہیں۔
’انسانوں کے جہاں میں‘ کے ذریعے پاکستان کے اس غیر متزلزل عزم کو بھی نمایاں کیا گیا ہے کہ وہ کشمیریوں کو ان کا بنیادی حق حقِ خودارادیت دلانے کے لیے ہر سطح پر ان کا ساتھ دیتا رہے گا۔
نغمہ نہ صرف کشمیریوں کے خلاف جاری بھارتی حیوانیت کی تصویر کشی کرتا ہے بلکہ عالمی ضمیر کو جھنجھوڑنے کی ایک کوشش بھی ہے، جو اب تک خاموش تماشائی بنا ہوا ہے۔
اس نغمے میں اس حقیقت کو بھی واضح انداز میں بیان کیا گیا ہے کہ دنیا کے ساتھ نہ دینے کے باوجود پاکستان ہمیشہ کشمیریوں کے شانہ بشانہ کھڑا رہا ہے اور آئندہ بھی کھڑا رہے گا۔
