خیبر پختونخوا کے ضلع سوات کے ایک نجی اسکول میں فائرنگ سے ایک بچی جاں بحق جبکہ 6 بچیاں زخمی ہو گئی ہیں۔ ابتدائی معلومات کے مطابق یہ واقعہ ڈیوٹی پر مامور پولیس اہلکار کی فائرنگ سے پیش آیا تاہم ابھی تک فائرنگ کرنے کی وجہ معلوم نہیں ہو سکی۔
ڈسٹرکٹ پولیس افسر سوات شفیع اللہ گنڈاپور نے وی نیوز کو بتایا ہے کہ فائرنگ کا واقعہ سوات کے علاقے سنگوٹہ کے ایک نجی اسکول میں پیش آیا ہے۔ فائرنگ سے زخمی ہونے والے 7 بچوں کو سیدو اسپتال منتقل کیا گیا جہاں ایک بچی دم توڑ گئی ہے۔
ڈی پی او سوات کے مطابق پولیس نے موقع پر پہنچ کر صورتحال پر قابو پالیا ہے جب کہ فائرنگ کے الزام میں محمد عالم نامی پولیس اہلکار کو اسلحہ سمیت گرفتار کر لیا گیا ہے۔ مزید تحقیقات کی جارہی ہیں۔
فائرنگ کے واقعے سے اسکول میں شدید افراتفری پھیل گئی اور والدین بچوں کو لینے کے لیے اسکول پہنچ گئے۔
