الیکشن کمیشن آف پاکستان نے قومی اسمبلی کے حلقہ این اے 18 ہری پور میں ضمنی انتخاب کے لیے شیڈول جاری کر دیا ہے۔
یہ نشست عمر ایوب خان کی نااہلی کے باعث خالی ہوئی تھی۔ نوٹیفکیشن کے مطابق حلقے میں پولنگ 23 نومبر 2025 کو ہوگی، جب کہ انتخابی عمل کے مختلف مراحل کے لیے تاریخیں بھی مقرر کر دی گئی ہیں۔
انتخابی شیڈول کی تفصیلات
پبلک نوٹس کا اجرا 10 اکتوبر 2025 کو ہوگا۔ کاغذاتِ نامزدگی جمع کرانے کی آخری تاریخ 13 اکتوبر ہے جبکہ نامزد امیدواروں کی فہرست 14 اکتوبر کو شائع کی جائے گی۔
کاغذاتِ نامزدگی کی جانچ پڑتال 17 اکتوبر کو ہوگی اور اپیل دائر کرنے کی آخری تاریخ 21 اکتوبر ہے۔
اپیلوں پر فیصلے 25 اکتوبر کو ہوں گے اور نظرثانی شدہ فہرست 26 اکتوبر کو شائع کی جائے گی۔ کاغذات واپس لینے کی آخری تاریخ 28 اکتوبر ہے اور انتخابی نشان الاٹمنٹ 29 اکتوبر کو ہوگی۔ پولنگ کا دن 23 نومبر 2025 ہے۔
الیکشن انتظامات
الیکشن کمیشن نے اس ضمنی انتخاب کے لیے ڈسٹرکٹ ریٹرننگ آفیسر، ریٹرننگ آفیسر اور اسسٹنٹ ریٹرننگ آفیسرز کی تعیناتی بھی کر دی ہے۔
ڈسٹرکٹ ریٹرننگ آفیسر ذوالفقار علی ہیں جو ریجنل الیکشن کمشنر، ہری پور ہیں۔ ریٹرننگ آفیسر نثار احمد خان، ڈپٹی کمشنر ایبٹ آباد، تعینات کیے گئے ہیں۔
اسسٹنٹ ریٹرننگ آفیسرز میں عبدالسلام، اسسٹنٹ کمشنر غازی؛ سجاد احمد، اسسٹنٹ کمشنر خانپور؛ اور محمد اشفاق، اسسٹنٹ کمشنر ہری پور شامل ہیں۔ نوٹیفکیشن پر ڈپٹی ڈائریکٹر (کوآرڈینیشن) محمد عدنان علی کے دستخط موجود ہیں۔
