لاہور میں پاکستان سعودی بزنس کونسل کے خصوصی وفد کے اعزاز میں تقریب کا اہتمام کیا گیا جس سے وزیراعلیٰ پنجاب مریم نواز نے خطاب کیا۔
اس موقع پر انہوں نے عربی میں مہمانوں کو خوش آمدید کہتے ہوئے کہا کہ اپنے دوسرے گھر سعودی عرب کے مہمانوں کی میزبانی اعزاز کی بات ہے، سعودی عرب سے تعلقات صرف سیاسی و معاشی نہیں بلکہ روحالی اور ابدی ہے۔
یہ بھی پڑھیے: سعودی پاک جوائنٹ بزنس کونسل کے وفد کی لاہور آمد، وزیراعلیٰ مریم نواز کی جانب سے پرتپاک استقبال
مریم نواز نے کہا کہ سعودی عرب نے پوری امت کا سر فخر سے بلند کیا ہے، رمضان میں سعودی عرب کے دورے کے دوران ولی عہد محمد بن سلمان سے ملاقات ہوئی، ان کی قائدانہ صلاحیتوں اور وژن کی وجہ سے سعودی عرب کو ترقی کے نئے منازل طے کررہا ہے۔
انہوں نے کہا کہ سعودی عرب سے میرے والد نواز شریف کے دہائیوں پر مبنی تعلقات ہیں، مشرف کے دور میں ہم 7 سال جدہ میں رہے، جدہ کو لاہور کی طرح جانتی ہوں۔
وزیراعلیٰ نے سعودی وفد کے سربراہ ہزہائینس پرنس منصور بن محمد بن سعد السعود کو خوش امدید کرتے ہوئے کہا کہ یہ ان کا پنجاب کا دوسرا دورہ ہے، آپ پاکستان کے بہترین دوست اور ہمارے مشترکہ خوابوں کے نگہبان ہیں۔
یہ بھی پڑھیے: پاکستان اور سعودی عرب کے درمیان آئی ٹی اور کھیلوں میں تعاون کے معاہدے
مریم نواز نے کہا کہ وزیراعظم شہباز شریف کا سعودی عرب میں حالیہ استقبال پر ہم نے خوشی منائی، سعودی عرب سے حالیہ معاہدے پر ہم شکرگزار ہیں جو ہمارے دوطرفہ تعلقات آئینہ دار ہے، ہم حرمین شریفین کی حفاظت کو ہم روحانی فرض اور اعزاز سمجھتے ہیں۔
وزیراعلیٰ نے کہا کہ سعودی بھائیوں سے مختلف شعبوں میں تجارتی تعاون کے خواہاں ہیں۔
اس موقع پر وفد کے سربراہ ہزہائینس پرنس منصور بن محمد بن سعد السعود نے خطاب کرتے ہوئے کہا کہ سعودی کاروباری ادارے پاکستان اور بالخصوص پنجاب میں مختلف شعبوں میں سرمایہ کاری کے خواہش مند ہیں جن میں ڈیری فارم، لائیو اسٹاک اور گوشت وغیرہ کے شعبے شامل ہیں۔
یہ بھی پڑھیے: سعودی عرب نے اوبر کے شریک بانی اور ریڈ سی گروپ کے سی ای او کو شہریت دے دی
ان کا کہنا تھا کہ پنجاب میں سیاحت میں شعبے میں تھیم پارک، ہاؤسنگ اور شاپنگ ایریاز بنانا چاہتے ہیں، اس کے علاوہ معدنیات، ایئرپورٹ، آئی ٹی، سیمی کنڈکٹرز، طب اور فارماسیوٹکل انڈسٹری میں موجود مواقع سے فائدہ اٹھانا چاہتے ہیں۔ ہمارے پاس کم لاگت اور وقت میں گھر بنانے کی ٹیکنالوجی موجود ہے، ہم یہاں کے کاروباری شعبے کو اس سے مستفید ہوتا دیکھنا چاہتے ہیں۔
آخر میں انہوں نے بزنس کونسل کی میزبانی پر وزیراعلیٰ مریم نواز کا شکریہ بھی ادا کیا۔
