لاہور میں پولیس اور حساس اداروں نے تحریک لبیک پاکستان (ٹی ایل پی) کے سربراہ سعد رضوی کے گھر پر چھاپہ مار کارروائی کے دوران برآمد ہونے والے سامان کی تفصیلات جاری کردی ہیں۔
یہ کارروائی پولیس، ایف آئی اے اور این سی سی آئی اے کی مشترکہ ٹیم نے کی، جس میں گھر سے بھاری مقدار میں سونا، چاندی، ملکی و غیر ملکی کرنسی اور قیمتی اشیا تحویل میں لی گئیں۔
سعد رضوی کے گھر پنجاب پولیس کے حالیہ ریڈ کے دوران برآمد ہونے والی ملکی و غیر ملکی کرنسی، طلائی زیورات، قیمتی گھڑیوں، پرائز بانڈز و دیگر سامان کی تفصیلات۔۔۔۔#PunjabPolice pic.twitter.com/IGnxFkPzD0
— Punjab Police Official (@OfficialDPRPP) October 14, 2025
رپورٹ کے مطابق گھر سے کل 11 کروڑ 42 لاکھ روپے مالیت کی ملکی و غیر ملکی کرنسی برآمد ہوئی، جس میں بھارتی کرنسی، امریکی ڈالر، یورو، پاؤنڈ اور سعودی ریال سمیت دیگر ممالک کی کرنسیاں شامل ہیں۔
پولیس کی جانب سے مزید بتایا گیا کہ ایک کلو 922 گرام سونا اور 989 گرام چاندی بھی برآمد ہوئی ہے۔
چھاپے کے دوران مختلف برانڈز کی 69 گھڑیاں،445 گرام وزنی 28 چوڑیاں اور کڑے، 490 گرام سونے کے 12 بریسلیٹ، 24 ہار، چینیں اور لاکٹس بھی حاصل کیے گئے۔
مزید تفصیلات کے مطابق 355 گرام سونے کی 46 انگوٹھیاں، 6 بریسلیٹ، 72 مختلف زیورات اور 460 گرام چاندی کا تاج اور 32 چاندی کی انگوٹھیاں بھی برآمد کی گئیں۔
حکام کے مطابق چھاپے کے دوران بڑی تعداد میں پرائز بانڈز بھی قبضے میں لیے گئے ہیں، جبکہ برآمد شدہ سامان کی تفصیلی رپورٹ اعلیٰ حکام کو ارسال کردی گئی ہے۔
یہ بھی پڑھیں: ٹی ایل پی احتجاج میں گاڑیاں جلانے کی ویڈیوز وائرل، ’ریاست کو انتشار پسندوں سے سختی سے نمٹنا ہوگا‘
واضح رہے کہ گزشتہ روز پولیس نے مریدکے میں تحریک لبیک پاکستان کے احتجاجی شرکا کو ایک آپریشن کے دوران منتشر کردیا تھا، جس کے بعد دعویٰ کیا جارہا تھا کہ سعد رضوی اور انس رضوی بھی گرفتاری ہوگئے ہیں، تاہم پولیس کا کہنا ہے کہ ان کی گرفتاری عمل میں نہیں آئی تاہم ٹریس کر لیا گیا ہے۔
