گورنر پنجاب سردار سلیم حیدر نے کہا ہے کہ وزیراعلیٰ خیبر پختونخوا سہیل آفریدی کو بانی پی ٹی آئی عمران خان سے اڈیالہ جیل میں ملنے دیا جائے، اس ملاقات سے نہ تو ملک کا کوئی نقصان ہوگا اور نہ ہی کوئی قیامت آئے گی۔
گورنر پنجاب سردار سلیم حیدر نے پشاور میں گورنر خیبرپختونخوا فیصل کریم کنڈی کے ہمراہ پریس کانفرنس کرتے ہوئے کہا کہ وہ کنڈی کی مہمان نوازی پر شکر گزار ہیں اور دونوں رہنماؤں کے درمیان ملاقات خوشگوار ماحول میں ہوئی۔
مزید پڑھیں: عباسپور: آپریشن ’بنیان مرصوص‘ کی کامیابی پر پیپلز پارٹی کی اظہار تشکر ریلی، گورنر پنجاب کی شرکت
گورنر پنجاب نے کہا کہ پیپلز پارٹی اور مسلم لیگ (ن) کے درمیان تعلقات باہمی احترام پر قائم ہیں۔ عام انتخابات کے بعد دونوں جماعتوں کے درمیان سیاسی اتحاد وجود میں آیا، جس کا مقصد ملک میں سیاسی استحکام لانا تھا۔
سردار سلیم حیدر نے کہا کہ گزشتہ 18 ماہ کی مخلوط حکومت پیپلز پارٹی کے لیے ایک مشکل اور بھیانک تجربہ ثابت ہوئی، تاہم اب تمام اتحادی جماعتیں نظام کو بہتر انداز میں چلانے کے لیے کوشاں ہیں۔
مزید پڑھیں: جہاں تارکین وطن کی کشتی ڈوبتی ہے، اس میں پاکستانی سوار ہوتے ہیں، گورنر پنجاب
ان کے مطابق، وزیراعظم شہباز شریف نے بلاول بھٹو زرداری کو یقین دہانی کرائی تھی کہ حکومت معاملات کے حل کے لیے مخلصانہ کوششیں کرے گی۔
گورنر پنجاب نے کہا کہ سیاسی معاملات کا حل سیاست کے ذریعے ہی ممکن ہے۔
انہوں نے واضح کیا کہ اگر سہیل آفریدی بانی پی ٹی آئی سے ملاقات کرتے ہیں تو اس میں کوئی حرج نہیں، کیونکہ سیاسی لوگوں کو ایک دوسرے سے بات چیت کا دروازہ کھلا رکھنا چاہیے۔
مزید پڑھیں: گورنر پنجاب سیلم حیدر خان اور وزیر اعلیٰ پنجاب مریم نواز کا اختلاف کیوں ہے؟
سردار سلیم حیدر کے مطابق، ملک کی بہتری اسی میں ہے کہ موجودہ حکومت اپنا دور مکمل کرے اور نظام استحکام کے ساتھ آگے بڑھے۔
پارلیمانی جرگہ تشکیل دیا جائے، بات چیت اور دلیل سے حقوق لیں گے، فیصل کریم کنڈی کا مطالبہ
گورنر خیبرپختونخوا فیصل کریم کنڈی نے کہا ہے کہ صوبے کے حقوق کے حصول کے لیے ایک پارلیمانی جرگہ تشکیل دیا جانا چاہیے تاکہ تمام معاملات کو دلیل اور مکالمے کے ذریعے حل کیا جا سکے۔
پریس کانفرنس سے خطاب کرتے ہوئے فیصل کریم کنڈی نے کہا کہ ہمیں این ایف سی ایوارڈ پر سنجیدہ بات چیت کرنی چاہیے، کیونکہ مالی وسائل کی منصفانہ تقسیم ہی وفاق اور صوبوں کے تعلقات کو مستحکم کر سکتی ہے۔
مزید پڑھیں: وزیراعلیٰ کے پی سے دوستی نہیں، فیصل کریم کنڈی نے علی امین گنڈاپور کو ’کل کا بچہ‘ قرار دیدیا
انہوں نے کہا کہ ماضی میں نہروں کے معاملے پر پنجاب اور سندھ کے درمیان اختلافات ہوئے، لیکن اب ہمیں ٹکراؤ نہیں بلکہ افہام و تفہیم کے ذریعے حل کی راہ اپنانا ہوگی۔
گورنر نے واضح کیا کہ خیبرپختونخوا کی ترقی کے لیے ان کے دروازے ہر ایک کے لیے کھلے ہیں۔ میں تمام سیاسی و سماجی رہنماؤں سے بات کرنے کے لیے تیار ہوں۔ صوبائی حکومت اپنا مقدمہ تیار کرے اور وفاق سے دلیل کے ساتھ بات کرے، میں ہر سطح پر تعاون کے لیے موجود ہوں۔
فیصل کریم کنڈی نے بتایا کہ خیبرپختونخوا میں کافی عرصے سے فوجی آپریشن جاری ہیں اور صوبے میں امن و امان کی صورتحال تشویشناک ہے۔
مزید پڑھیں: امریکی ناظم الامور کی فیصل کریم کنڈی سے ملاقات، مختلف پروجیکٹس پر بات چیت
انہوں نے کہا کہ ہم امن چاہتے ہیں، لیکن افغانستان کی سرزمین بدقسمتی سے پاکستان کے خلاف دہشتگردی کے لیے استعمال ہو رہی تھی۔ اب وقت آ گیا ہے کہ ہم سب مل کر امن اور ترقی کے لیے مشترکہ حکمت عملی اپنائیں۔
مسلم لیگ (ن) سے اتحاد مجبوری کا نتیجہ ہے، گورنر پنجاب سردار سلیم حیدر
گورنر پنجاب نے کہا کہ سسٹم ڈی ریل ہو جائے تو دوسرا کوئی آپشن نہیں رہتا، اس لیے سب کو جمہوری تسلسل کے ساتھ چلنا چاہیے۔ پیپلز پارٹی اور مسلم لیگ (ن) کے درمیان اتحاد محبت کا نہیں بلکہ مجبوری کا نتیجہ ہے۔ الیکشن کے بعد حکومت بنانے کے لیے دونوں جماعتوں کو اکٹھا ہونا پڑا۔
سردار سلیم حیدر نے کہا کہ وزیراعظم شہباز شریف نے پیپلز پارٹی کے تحفظات دور کرنے کی یقین دہانی کرائی ہے، تاہم ابھی بھی عوام مشکلات میں ہیں جنہیں حل کرنا حکومت کی اولین ترجیح ہونی چاہیے۔
مزید پڑھیں: سہیل آفریدی خود اسلام آباد پر چڑھائی کرچکے، ان پر شکوک و شبہات بلاجواز نہیں، رانا ثنااللہ
انہوں نے امید ظاہر کی کہ اب معاملات بہتر سمت میں آگے بڑھیں گے اور بتایا کہ ہم کوشش کر رہے ہیں کہ پنجاب میں معاملات بہتر ہوں، کیونکہ پنجاب کو ہمیشہ بڑے بھائی کا کردار ادا کرنا چاہیے۔
گورنر پنجاب نے کہا کہ کے پی حکومت کو سیاسی عمل میں شامل ہونا ہوگا اور اپنے حقوق سیاسی طریقے سے حاصل کرنے چاہییں۔ صوبوں کو ان کے جائز حقوق دلوانے کے لیے اچھے ورکنگ ریلیشنز ضروری ہیں۔
ان کا کہنا تھا کہ ہم ملک کی بہتری کے لیے اپنا نقصان برداشت کرنے کو تیار ہیں، کیونکہ عوام کے مفاد کو ہمیشہ ترجیح دینی چاہیے۔
