وزیراعظم محمد شہباز شریف نے پاکستان میں گوگل کی جانب سے دفاتر کے قیام اور سرمایہ کاری کے منصوبوں کا خیرمقدم کرتے ہوئے کہا ہے کہ یہ اقدام حکومت کی ان پالیسیوں پر اعتماد کا اظہار ہے جن کا مقصد ملک میں کاروبار میں آسانی اور غیر ملکی سرمایہ کاری کو فروغ دینا ہے۔
یہ بھی پڑھیں: پاکستان میں گوگل کروم بُک کی پہلی اسمبلی لائن کا افتتاح، عام صارفین کو کیا فائدہ ہوگا؟
شہباز شریف نے ہری پور میں گوگل کی مصنوعات کی اسمبلی لائن کے قیام کو خوش آئند قرار دیتے ہوئے کہا کہ اس سے نہ صرف ملک میں ٹیکنالوجی کے شعبے میں ترقی ہوگی بلکہ مقامی سطح پر آئی ٹی مصنوعات کی تیاری سے عوام کو سستی ٹیکنالوجی دستیاب ہوگی۔
ڈیجیٹل پاکستان کے وژن کی جانب ایک اہم قدم
وزیراعظم نے کہا کہ حکومت نے روز اول سے پاکستان کو ڈیجیٹل نیشن بنانے کو اپنی ترجیحات میں شامل کیا۔
ان کے مطابق ملک کے نوجوانوں کو آئی ٹی کے شعبے میں بااختیار بنانے کے لیے حکومت ہر ممکن اقدامات کر رہی ہے۔
مزید پڑھیے: گوگل نے پنجاب حکومت کو بڑی پیشکش کردی
انہوں نے کہا کہ گوگل کی جانب سے پاکستانی نوجوانوں کی تربیت کے لیے مفاہمتی یادداشت پر دستخط اسی سلسلے کی ایک اہم کڑی ہے جو نوجوانوں کو عالمی معیار کی مہارتوں سے آراستہ کرنے میں مدد دے گی۔
نوجوانوں کے لیے لیپ ٹاپس اور تربیتی پروگرام
وزیراعظم شہباز شریف نے بتایا کہ وفاقی حکومت ایک لاکھ باصلاحیت نوجوانوں کو لیپ ٹاپس فراہم کر رہی ہے تاکہ وہ انفارمیشن ٹیکنالوجی کے شعبے میں ترقی کے مواقع حاصل کر سکیں۔
وزیرِ اعظم محمد شہباز شریف کا پاکستان میں گوگل کی جانب سے دفاتر کے قیام اور سرمایہ کاری کا خیرمقدم، ہری پور میں گوگل کی مصنوعات کی اسمبلی لائن کا قیام خوش آئند قرار
گوگل جیسی بین الاقوامی آئی ٹی کمپنیاں پاکستان میں کاروباری میں آسانی اور سرمایہ کاری کو فروغ دینے کی حکومت کی… pic.twitter.com/1Z0in6CPk0
— PTV News (@PTVNewsOfficial) November 7, 2025
انہوں نے کہا کہ ملک بھر میں نوجوانوں بشمول خواتین کے لیے آئی ٹی تربیتی پروگرامز جاری ہیں جن کے مثبت نتائج سامنے آ رہے ہیں۔
مزید پڑھیں: پرائم منسٹر یوتھ لیپ ٹاپ اسکیم 2025 کا باقاعدہ آغاز ہوگیا
ان کا کہنا تھا کہ ان پروگراموں کی بدولت نوجوان اب بین الاقوامی سروس انڈسٹری میں زیادہ مسابقتی ہو رہے ہیں اور باعزت روزگار حاصل کر کے خود کفیل بن رہے ہیں۔
ٹیکنالوجی کے فروغ اور برآمدی صنعت میں بہتری
وزیراعظم شہباز شریف نے کہا کہ مقامی سطح پر آئی ٹی مصنوعات کی تیاری سے نہ صرف درآمدی انحصار کم ہوگا بلکہ برآمدی صنعت کے فروغ سے ملک کے لیے زرمبادلہ میں اضافہ بھی ممکن ہوگا۔
یہ بھی پڑھیے: گوگل نے تاریخ رقم کردی، ایک سہ ماہی میں 100 بلین ڈالر سے زائد آمدنی
انہوں نے مزید کہا کہ حکومت پاکستان کو خطے میں انفارمیشن ٹیکنالوجی کا مرکز بنانے کے لیے تیزی سے اقدامات کر رہی ہے۔
آئی ٹی وزارت کی کاوشوں کی تعریف
وزیراعظم نے ملک میں آئی ٹی کے فروغ کے لیے وفاقی وزیر انفارمیشن ٹیکنالوجی اور ان کی ٹیم کی کاوشوں کو قابل تحسین قرار دیتے ہوئے کہا کہ ان کی انتھک کوششوں سے پاکستان ٹیکنالوجی کے میدان میں نمایاں پیشرفت کر رہا ہے۔
