بلوچستان میں سکیورٹی فورسز کی چوکی پر دہشت گردوں کے حملے میں شدید فائرنگ کے تبادلے میں 3 فوجی جوان جام شہادت نوش کر گئے۔ سیکیورٹی فورسز کی جوابی کارروائی میں ایک دہشت گرد بھی ہلاک ہو گیا۔ فرار ہونے والے دہشت گردوں کے ٹھکانے کی نشاندہی کر لی گئی ہے۔
آئی ایس پی آر کے مطابق بلوچستان میں مارگیٹ کے علاقے زرغون میں علیٰ الصبح سیکیورٹی فورسز کی چوکی پر دہشت گردوں نے حملہ کیا، شدید فائرنگ کے تبادلے میں 3 فوجی جوان جام شہادت نوش کر گئے۔ سیکیورٹی فورسز کی مؤثر جوابی کارروائی کے نتیجے میں ایک دہشت گرد ہلاک ہوگیا۔
آئی ایس پی آر کا کہنا ہے کہ یہ فوجی چوکی علاقے میں کوئلے کی کانوں کو نشانہ بنا کر بھتہ خوری روکنے کے لیے قائم کی گئی تھی۔ چوکی پر موجود فوجیوں کی بھرپور جوابی کارروائی نے دہشت گردوں کو پیچھے دھکیل دیا تھا۔
ترجمان کا کہنا ہے کہ قریبی پہاڑوں کی جانب فرار ہونے والے دہشت گردوں کے ٹھکانے کی نشاندہی کر لی گئی ہے۔ پہاڑوں میں چھپے دہشت گردوں کے گرد گھیرا تنگ کرکے آپریشن پوری کامیابی سے جاری ہے۔ ترجمان کا کہنا تھا سکیورٹی فورسز، قوم کے ساتھ مل کر بلوچستان کے امن، استحکام اور ترقی کو سبوتاژ کرنے کی ہر کوشش ناکام بنائیں گی۔
