پاکستان تحریک انصاف (پی ٹی آئی) کے مرکزی صدر چوہدری پرویز الہٰی نے کہا ہے کہ عوام اور فوج کو آپس میں لڑانا نوازشریف اور مودی کا ایجنڈا ہے۔ پنجاب اور خیبر پختونخوا میں غیر قانونی نگران حکومتوں کے خاتمہ کے لیے عدلیہ سے رجوع کریں گے۔
پاکستان تحریک انصاف (پی ٹی آئی ) کے مرکزی صدر اور سابق وزیر الہٰی نے اپنے ایک بیان میں کہا ہے کہ جب ہمارے جوان سرحدوں پر بھارتی افواج کے ہاتھوں شہید ہو رہے تھے تو نواز شریف، بھارتی وزیر اعظم نریندرامودی اور جندال کو بغیر ویزہ کے گھر بلا کر کھانے کھلا رہے تھے۔
انہوں نے سوال کیا کہ کیا ہم ڈان لیکس کو بھول جائیں۔؟ پنجاب کی نالائق حکومت نے اتنا شور مچایا ہوا تھا کہ زمان پارک میں دہشت گرد موجود ہیں لیکن یہ لوگ عالمی ذرائع ابلاغ کی موجودگی میں جعلی کارروائی ڈالنے میں ناکام رہے ہیں۔
انہوں نے کہا کہ پاکستان تحریک انصاف (پی ٹی آئی ) کے چیئرمین عمران خان نے اپنے دور اقتدار میں پاک فوج اور دفاع پاکستان کو مزید مضبوط کیا، عمران خان نے مغربی دنیا میں پاک فوج کے بارے غلط فہمیاں دور کرنے کی بھرپورکوشش کی۔
بیان میں انہوں نے مزید کہا کہ پنجاب کی کٹھ پتلی حکومت پھر حالات خراب کرنا چاہتی ہے، نگران وزیر اعلیٰ محسن نقوی اور ان کا ’ٹولہ‘ ملک دشمن ایجنڈے پر ہیں ۔
انہوں نے کہا کہ لاہورہائی کورٹ کا تحریک انصاف کے ارکان اسمبلی کی رکنیت کی بحالی کا فیصلہ خوش آئند ہے ۔ بحالی کا یہ عمل آگے بڑھے تو وفاق اور صوبوں میں سیاسی بحران کا پرامن حل نکل سکتا ہے۔
انہوں نے مزید کہا کہ پنجاب اور خیبر پختونخوا میں نگران حکومتیں آئینی طور پر ختم ہو چکی ہیں۔ پنجاب اور خیبر پختونخوا میں غیر قانونی نگران حکومتوں کے خاتمہ کے لیے عدلیہ سے رجوع کریں گے۔
انہوں نے کہا کہ پارٹی چھوڑنے والے سیاسی خانہ بدوشوں کی کوئی اہمیت نہیں، پارٹی پہلے ہی ان کو مسترد کر چکی ہے۔ تحریک انصاف کو اندر اور باہر سے توڑنے کی کوئی کوشش کامیاب نہیں ہو گی۔
تحریک انصاف عمران خان کی قیادت میں متحد ہے اور ہمیشہ متحد رہے گی۔ تحریک انصاف اورسیز پاکستانیوں کی مقبول ترین نمائندہ پارٹی ہے۔ عمران خان صرف پاکستان کے نہیں، عالم اسلام کے بھی مقبول ترین لیڈر ہیں۔
پرویز الہیٰ نے بیان میں مزید کہا کہ عرب ذرائع ابلاغ اپنے جائزوں میں عمران خان کو اہل عرب کا پسندیدہ ترین لیڈر قرار دے چکے ہیں۔ عمران خان نے مغربی دنیا میں اسلام اور پاکستان کی سر بلندی کے لیے سب سے زیادہ کام کیا۔
انہوں نے کہا کہ عمران خان نے ناموس رسالت صلی اللہ علیہ وسلم کے لیے اقوام متحدہ میں آواز بلند کی۔ تحریک انصاف پر پابندی کا مطالبہ کرنے والے اسلام اور پاکستان کے ساتھ مخلص نہیں۔
سب کی خبر
