پاکستان تحریک انصاف کے سابق ممبر قومی اسمبلی عثمان خان ترکئی اور پی ٹی آئی کراچی کے صدر آفتاب صدیقی نے تحریک انصاف کو خیر باد کہہ دیا ہے۔
پشاور میں پریس کانفرنس کرتے ہوئے عثمان ترکئی نے کہا کہ 9 مئی کے واقعات قابل مذمت ہیں جس کے بعد فیصلہ کیا ہے کہ ہم تحریک انصاف کےساتھ مزید نہیں چل سکتے۔
پی ٹی آئی کے سابق ایم این اے عثمان ترکئی نے پارٹی چھوڑے کا اعلان کردیا #PTIOfficial #UsmanTarakai pic.twitter.com/S1i6hj5hZx
— Kamran Ali (@akamran111) May 21, 2023
ان کا کہنا تھا کہ آئندہ کا لائحہ عمل اپنے دوستوں کی مشاورت کے بعد سامنے لاؤں گا۔ ہم آخری دم تک عمران خان کے ساتھ کھڑے رہے مگر 9 مئی کو جو کچھ ہوا اس کی حمایت نہیں کر سکتے اسی لیے ہم نے 20 مئی کے روز افواج پاکستان کے ساتھ اظہار یکجہتی کے لیے ریلی کا بھی انعقاد کیا۔
یہ بھی پڑھیں وی ایکسکلوسیو: فواد چوہدری پی ٹی آئی چھوڑ دیں گے، شاہد خاقان نئی پارٹی بنائیں گے، بریگیڈیئر ریٹائرڈ حارث نواز
عثمان خان ترکئی نے کہا کہ میں آئندہ الیکشن تحریک انصاف کے ٹکٹ سے نہیں لڑوں گا اس لیے تحریک انصاف کی بنیادی رکنیت سے بھی استعفیٰ دے رہا ہوں۔
ان کا کہنا تھا کہ میں نے 2015 میں تحریک انصاف میں شمولیت اختیار کی تھی۔ میرا تعلق کرنل شیر خان شہید کے گاؤں سے ہے۔
سیاست سے ہی کنارہ کشی اختیار کر رہا ہوں: آفتاب صدیقی
دوسری جانب پی ٹی آئی کراچی کے صدر آفتاب صدیقی نے کہا ہے کہ میں پاکستان کی بہتری کے لیے کام کرنا چاہ رہا تھا مگر ایسا نہ ہو سکا۔ میں نے تحریک انصاف کے عہدوں سے استعفیٰ دے دیا اور اب سیاست سے بھی کنارہ کشی اختیار کر رہا ہوں لیکن انفرادی طور پر ملک کی خدمت کرتا رہوں گا۔
تحریک انصاف کراچی کے صدر آفتاب صدیقی نے پارٹی اور سیاست کو خیر باد کہہ دیا pic.twitter.com/OzFaMf3A7i
— Faizullah Khan فیض (@FaizullahSwati) May 21, 2023
واضح رہے کہ چیئرمین تحریک انصاف عمران خان کی گرفتاری کے بعد پی ٹی آئی کارکنوں کی جانب سے ملک گیر احتجاج کے دوران فوجی تنصیبات اور دیگر ملکی املاک پر دھاوا بول کر توڑ پھوڑ کی گئی تھی جس کے بعد تحریک انصاف کے کئی رہنما پارٹی کو چھوڑ چکے ہیں۔
یہ بھی پڑھیں 9مئی کے واقعات پر عامر کیانی نے پی ٹی آئی چھوڑ دی، سیاست سے بھی دستبردار
اس سے قبل کراچی سے ایم این اے محمود مولوی، عامر محمود کیانی، اقبال وزیر، ہشام انعام اللہ، اجمل وزیر، سندھ اسمبلی میں 2 ارکان ڈاکٹر سنجے گنگوانی، کریم گبول اور بلوچستان اسمبلی میں سابق وزیر مبین خلجی پارٹی کو خیر باد کہہ چکے ہیں اور بتایا جا رہا ہے کہ مزید کئی رہنما بھی جماعت کو چھوڑنے کے لیے پر تول رہے ہیں۔