محکمہ ایکسائز سندھ کی کارروائیاں تیز، صوبہ بھر میں بڑی مالی وصولی

سندھ کے وزیر برائےایکسائز اینڈ ٹیکسیشن مکیش کمار چاولہ کی ہدایت پر محکمہ ایکسائز اینڈ ٹیکسیشن نے صوبہ بھر میں جاری روڈ چیکنگ مہم کے اعدادوشمار جاری کر دیے گئے ہیں۔

محکمہ ایکسائز اینڈ ٹیکسیشن کےترجمان کے مطابق مہم کا آغاز 27 اکتوبر سے ہوا، جس کے دوران مجموعی طور پر 26 ہزار 716 گاڑیوں کی جانچ پڑتال کی گئی۔

مختلف خلاف ورزیوں پر جرمانوں اور موٹر وہیکل رجسٹریشن ٹیکس کی مد میں مجموعی طور پر ایک کروڑ 57 لاکھ 57 ہزار 997 روپے وصول کیے گئے۔

یہ بھی پڑھیں: سندھ میں گاڑیوں کی نمبر پلیٹس کی تبدیلی کی تاریخ میں ایک بار پھر توسیع

اعداد و شمار کے مطابق کراچی ڈویژن میں 9 ہزار 146 گاڑیاں چیک کی گئیں اور 55 لاکھ 59 ہزار 183 روپے ٹیکس و جرمانے وصول کیے گئے۔

حیدرآباد ڈویژن میں 6 ہزار 289 گاڑیوں کی چیکنگ کے دوران 29 لاکھ 32 ہزار 398 روپے وصول کیے گئے۔

سکھر ڈویژن میں 1 ہزار 999 گاڑیوں کو چیک کیا گیا اور 5 لاکھ 65 ہزار 280 روپے کی وصولی ہوئی۔

مزید پڑھیں:حکومت سندھ کا ٹیکس چوروں کے نام اخبارات میں شائع، اکاؤنٹس منجمند کرنے کا فیصلہ

لاڑکانہ ڈویژن میں 2 ہزار 836 گاڑیوں کی چیکنگ سے 25 لاکھ 19 ہزار 763 روپے جبکہ میرپورخاص ڈویژن میں 3 ہزار 526 گاڑیوں کی چیکنگ کے دوران 15 لاکھ 51 ہزار 375 روپے وصول کیے گئے۔

اسی طرح شہید بینظیر آباد ڈویژن میں 2 ہزار 923 گاڑیاں چیک کی گئیں اور 26 لاکھ 29 ہزار 998 روپے ٹیکس و جرمانوں کی مد میں حاصل کیے گئے۔

ترجمان نے بتایا کہ مہم کو مزید مؤثر بنانے کے لیے چیکنگ کا دائرہ کار بڑھایا جا رہا ہے۔