وزیراعظم محمد شہباز شریف نے کہا ہے کہ پاکستان اور کرغزستان کے درمیان تعلقات خوشگوار اور برادرانہ ہیں اور دونوں ممالک کے تعلقات کو نئی بلندیوں تک لے جانے کا عزم رکھتے ہیں۔
مزید پڑھیں: پاکستان اور کرغزستان کے درمیان متعدد شعبوں میں معاہدوں اور مفاہمتی یادداشتوں کا تبادلہ
انہوں نے صدر صادر ژاپاروف کے دورے کو دوطرفہ تعلقات کو مستحکم کرنے اور مختلف شعبوں میں تعاون کو نئی جہت دینے کے لیے اہم قرار دیا اور پاکستان کے 24 کروڑ عوام کی طرف سے صدر ژاپاروف کا خیرمقدم کیا۔
پاک کرغز مفاہمت کی یادداشتوں پر دستخط کی تقریب سے خطاب کرتے ہوئے وزیراعظم نے بتایا کہ دونوں ملکوں نے توانائی، تجارت، معاشی روابط، ثقافت اور دیگر شعبوں میں تعاون بڑھانے پر بات چیت کی۔
مزید پڑھیں: کرغزستان کے صدر پاکستان پہنچ گئے، صدر مملکت و وزیراعظم نے خوش آمدید کہا
انہوں نے کہا کہ پاکستان کرغزستان بزنس فورم کے ذریعے تجارتی تعلقات میں اضافہ ممکن ہوگا اور 2 سال میں دوطرفہ تجارتی حجم 15 ملین ڈالر سے بڑھا کر 200 ملین ڈالر تک لے جانے کا ہدف مقرر کیا گیا ہے۔
شہباز شریف نے کہا کہ دونوں ممالک علاقائی استحکام اور عوامی مفاد کے لیے مل کر کام کریں گے اور تعلقات کو مضبوط اور دیرپا بنانے کے لیے ہر ممکن تعاون کریں گے۔
