بگ بیش لیگ 2025-26 کے آغاز پر پاکستانی اسٹار بلے باز بابر اعظم کی سڈنی سکسرز کی جانب سے پہلی اننگز توقعات کے برعکس ثابت ہوئی۔ پرتھ کے آپٹس اسٹیڈیم میں کھیلے گئے میچ میں بابر اعظم صرف 2 رنز بنا کر آؤٹ ہوگئے۔
یہ بھی پڑھیں: بابر اعظم بگ بیش لیگ کے مہنگے ترین کھلاڑیوں میں شامل، سڈنی سکسرز نے کتنے میں خریدا؟
بابر اعظم نے اننگز کا آغاز کیا تاہم وہ 5 گیندوں پر 2 رنز بنانے کے بعد بروڈی کاؤچ کی گیند پر وکٹ گنوا بیٹھے۔ وہ سڈنی سکسرز کے دوسرے آؤٹ ہونے والے کھلاڑی تھے۔ اس سے قبل ایرون ہارڈی نے ڈینیل ہیوز کو صفر پر آؤٹ کرکے پہلی کامیابی حاصل کی۔
بارش کے باعث میچ کے اوورز کم کرکے ایک ٹیم کے لیے 11 اوورز مقرر کیے گئے جس سے کھیل کا تسلسل متاثر ہوا۔ مختصر میچ میں بابر اعظم اپنی صلاحیتوں کا بھرپور اظہار نہ کرسکے، حالانکہ وہ ٹی 20 انٹرنیشنل کرکٹ میں سب سے زیادہ رنز بنانے کا اعزاز رکھتے ہیں۔
یہ بھی پڑھیں: بگ بیش لیگ کی ڈرافٹنگ کا مرحلہ، کتنے پاکستانی کھلاڑیوں کو منتخب کرلیا گیا؟
حالیہ فارم پر نظر ڈالیں تو بابر اعظم نے پاکستان میں کھیلی گئی ٹی 20 آئی سہ ملکی سیریز میں 5 میچز میں 127 رنز بنائے تھے۔ ایشیا کپ 2025 میں ان کی عدم شمولیت پر بھی خاصی بحث ہوئی، جہاں پاکستان ٹیم فائنل تک پہنچی مگر ٹائٹل اپنے نام نہ کرسکی۔
اکتوبر 2025 میں جنوبی افریقہ کے خلاف ہوم سیریز میں بابر اعظم نے شاندار واپسی کرتے ہوئے بین الاقوامی ٹی 20 کرکٹ میں سب سے زیادہ رنز بنانے کا نیا ریکارڈ قائم کیا اور روہت شرما کو پیچھے چھوڑ دیا۔
یہ بھی پڑھیں: بگ بیش لیگ، میلبرن اسٹارز کا پاکستانی شائقین کے لیے ہاؤس آف رؤف اسٹینڈ کے قیام کا اعلان
اب بگ بیش لیگ میں بابر اعظم کی اگلی اننگز پر شائقین کرکٹ اور ماہرین کی نظریں مرکوز ہیں، جہاں ان سے ایک مضبوط اور فیصلہ کن کارکردگی کی امید کی جا رہی ہے۔
