وزیراعظم آزاد کشمیر راجا فیصل ممتاز راٹھور نے تجربہ کار سیاسی رہنما سید عزادار حسین کاظمی کو اپنا سیاسی معاون مقرر کردیا۔
سید عزادار حسین کاظمی کو کھیل، ثقافت اور امورِ نوجوانان کے شعبوں میں کلیدی ذمہ داریاں سونپی گئی ہیں۔
ان کی تقرری پر سیاسی و صحافتی حلقوں میں خوشی کا اظہار کیا جا رہا ہے، جبکہ عوامی اور سیاسی حلقوں نے فیصلے کا خیرمقدم کیا ہے۔
سید عزادار حسین کاظمی وسیع سیاسی و انتظامی تجربے کے حامل ہیں۔
انہوں نے سابق وزیراعظم بیرسٹر سلطان کے دور میں پولیٹیکل سیکریٹری اور سابق وزیراعظم چوہدری عبدالمجید کے دور میں میڈیا ایڈوائزر کے طور پر فرائض انجام دیے۔
علاوہ ازیں وہ اسپیکر آزاد جموں و کشمیر قانون ساز اسمبلی چوہدری لطیف اکبر کے معاون خصوصی بھی رہ چکے ہیں۔
تقرری کے بعد توقع کی جا رہی ہے کہ حکومتی ٹیم مزید مضبوط ہو جائے گی اور نوجوانوں، کھیل اور ثقافت کے شعبوں پر خصوصی توجہ دی جائے گی۔
