معروف آسٹریلوی اداکارہ ریچل کارپانی طویل علالت کے بعد 45 برس کی عمر میں انتقال کر گئیں۔
خاندان کی جانب سے جاری بیان کے مطابق ریچل کارپانی طویل عرصے سے ایک دائمی بیماری میں مبتلا تھیں اور اسی علالت کے بعد وہ پرسکون طور پر اس دنیا سے رخصت ہو گئیں۔ بیان میں کہا گیا کہ ان کا انتقال غیر متوقع تھا، تاہم وہ آخری لمحات میں سکون میں تھیں۔
یہ بھی پڑھیں: معروف اداکارہ بینا مسرور 67 سال کی عمر میں انتقال کرگئیں
اہلِ خانہ کے مطابق مرحومہ کی آخری رسومات 19 دسمبر کو قریبی عزیز و اقارب اور دوستوں کی موجودگی میں نجی طور پر ادا کی جائیں گی۔ خاندان نے اس مشکل وقت میں میڈیا اور عوام سے رازداری کی اپیل کی ہے۔
اگرچہ بیماری کی تفصیلات ظاہر نہیں کی گئیں، تاہم میڈیا رپورٹس کے مطابق ریچل کارپانی کو 2021 میں پیٹ میں شدید درد کے باعث اسپتال منتقل کیا گیا تھا جہاں ان کی ایک نامعلوم عارضے کے تحت سرجری بھی کی گئی تھی۔
یہ بھی پڑھیں: مسلم خاتون ڈاکٹر کا نقاب کھینچ کر اتارنے کا افسوسناک واقعہ، بھارت میں وزیراعلیٰ نتیش کمار کی نااہلی کی تحریک چل پڑی
ریچل کارپانی نے آسٹریلیا اور امریکا میں ایک کامیاب فنی کیریئر بنایا۔ وہ آسٹریلیا میں طویل عرصے تک نشر ہونے والے ڈرامہ سیریل مکلیوڈز ڈاٹرز میں جوڈی فاؤنٹین کے کردار کے باعث خاصی شہرت حاصل کر چکی تھیں جس میں انہوں نے متعدد سیزنز میں اداکاری کی۔
امریکا میں بھی انہوں نے نمایاں ٹیلی وژن پروجیکٹس میں کام کیا، جن میں NCIS: لاس اینجلس، دی گلیڈز، اِف دیئر بی تھورنز اور دی ریچلز شامل ہیں۔ اس کے علاوہ وہ لائف ٹائم نیٹ ورک کے پولیس ڈرامہ اگینسٹ دی وال میں بھی مرکزی کردار میں نظر آئیں جہاں انہوں نے جیسن جارج اور ماریسا رامیرز کے ساتھ اداکاری کی۔
یہ بھی پڑھیں: کیا آنگ سان سوچی انتقال کرگئیں، بیٹے کا بیان سامنے آگیا
فنی خدمات کے ساتھ ساتھ ریچل کارپانی کو ایک خاندانی مزاج اور خوش اخلاق شخصیت کے طور پر بھی جانا جاتا تھا۔ ان کی سوشل میڈیا سرگرمیوں میں اکثر اپنے اہلِ خانہ سے محبت اور وابستگی کا اظہار نمایاں رہتا تھا۔
ان کے انتقال پر شوبز انڈسٹری سے تعلق رکھنے والی شخصیات اور مداحوں کی جانب سے گہرے رنج و غم کا اظہار کیا جا رہا ہے اور انہیں ایک باصلاحیت اداکارہ کے طور پر خراجِ تحسین پیش کیا جا رہا ہے۔
