کراچی بار ایسوسی ایشن کے انتخابات کیوں مؤخر ہوئے؟

پاکستان بھر میں ہر سال ماہِ نومبر سے مختلف بار ایسوسی ایشنز کے انتخابات کے حوالے سے گہماگہمی اپنے عروج پر ہوتی ہے، وکلا کی دعوتیں، اشتہاری مہمات اور ملاقاتیں عام انتخابات جیسا ماحول بنا دیتی ہیں۔

خاص طور پر کراچی میں سٹی کورٹ کے انتخابات کا تذکرہ گھر گھر ہوتا ہے، اس کی وجہ یہ ہے کہ یہ عدالتیں عام شہریوں سے براہِ راست جڑی ہوتی ہیں اور کسی نہ کسی کام سے ہر دوسرا شہری سٹی کورٹ کراچی ضرور گیا ہوتا ہے۔

یہ بھی پڑھیں: سیاسی عزائم والے وکلا جوڈیشل کمیشن اجلاس کو سبوتاژ کرنا چاہتے ہیں، بار ایسوسی ایشنز نے ہڑتال کی کال مسترد کردی

سٹی کورٹ میں وکلا کی نمائندہ تنظیم، کراچی بار ایسوسی ایشن، ہر سال دسمبر میں انتخابات کا انعقاد کرتی ہے، اس سلسلے میں نہ صرف سٹی کورٹ بلکہ شہر کے مختلف علاقوں میں بھی تشہیری سرگرمیاں دیکھنے میں آتی ہیں، اہم مقدمات کے سوا وکلا اپنے مقدمات کی تاریخیں آگے بڑھا دیتے ہیں، اور معمول کا عدالتی کام رکا ہوا محسوس ہوتا ہے۔

کراچی بار ایسوسی ایشن کے موجودہ صدر عامر نواز وڑائچ اور جنرل سیکرٹری رحمان کورائی دوبارہ منتخب نہ ہوجائیں،پہلے مختلف حیلے بہانے کیے گئے بات نہ بنی تو اچانک چیف الیکشن کمشنر بیمار پڑ گئے اور اسطرح آج ہونے والے الیکشن ملتوی کردیے گئے،عامر نواز وڑائچ اور رحمان کورائی ایڈووکیٹ… pic.twitter.com/AS6DlSk8u7

— Shahid Hussain (@ShahidHussainJM) December 18, 2025

روایت کے عین مطابق ہر سال کی طرح سال 2025-26 کے لیے کراچی بار کے انتخابات 18 دسمبر کو منعقد ہونا تھے، تمام تیاریاں مکمل تھیں، وکلا کو اگلے دن اپنے نمائندوں کا انتخاب کرنا تھا، عدالتی امور کو الیکشن کے باعث معطل کر دیا گیا تھا اور ووٹرز بھرپور تیاری کے ساتھ پولنگ اسٹیشنز پہنچے، تاہم کراچی بار کی تاریخ میں پہلی بار تمام انتظامات مکمل ہونے کے باوجود ایک ووٹ بھی کاسٹ ہوئے بغیر انتخابات موخر کر دیے گئے۔

ابتدائی اطلاعات کے مطابق کراچی بار ایسوسی ایشن کے سالانہ انتخابات چیف الیکشن کمشنر، ڈسٹرکٹ اینڈ سیشن جج وسطی نعیم میمن کی طبیعت ناسازی کے باعث ملتوی ہوئے، دن بھر امیدوار اور ان کے ووٹرز پولنگ کے آغاز کے منتظر رہے، تاہم تکنیکی وجوہات کی بنا پر نئے چیف الیکشن کمشنر کا تقرر نہ ہو سکا، جس کے بعد دوپہر میں پریزائیڈنگ افسران نے پولنگ کا سامان واپس جمع کرا دیا۔

سندھ ہائی کورٹ

کراچی بار ایسوسی ایشن کے انتخابات ملتوی ہونے کا معاملہ

کراچی بار کابینہ اور امیدواران کی چیف جسٹس سندھ ہائی کورٹ سے ملاقات

چیف جسٹس سے ملاقات میں کراچی بار انتخابات کے جلد انعقاد پر بات ہوئی ہے، صدر کراچی بار عامر وڑائچ

چیف جسٹس صاحب نے تین مجوزہ تاریخیں تحریری… pic.twitter.com/jtOgd7KNvX

— Shahid Hussain (@ShahidHussainJM) December 19, 2025

الیکشن شیڈول کے مطابق کراچی بار ایسوسی ایشن کے سالانہ انتخابات کے لیے پولنگ کا آغاز صبح 9 بجے ہونا تھا، تاہم مقررہ وقت گزر جانے کے باوجود پولنگ شروع نہ ہو سکی، جوائنٹ سیکریٹری عرفان عزیز اور سیکریٹری بار کے امیدوار کے مطابق جب تاخیر سے متعلق معلومات حاصل کی گئیں تو بتایا گیا کہ چیف الیکشن کمشنر، ڈسٹرکٹ اینڈ سیشن جج وسطی نعیم میمن کی غیر موجودگی کے باعث پولنگ کا عمل روک دیا گیا ہے، کیونکہ وہ طبیعت کی خرابی کے باعث فرائض انجام دینے سے قاصر ہیں۔

اس صورتحال کے پیش نظر کراچی بار ایسوسی ایشن کے جنرل سیکریٹری غلام رحمان کورائی کی جانب سے رجسٹرار سندھ ہائیکورٹ کو لکھے گئے ایک باقاعدہ خط میں مؤقف اختیار کیا گیا کہ چیف الیکشن کمشنر رات گئے دل کا دورہ پڑنے کے بعد اسپتال میں زیرِ علاج ہیں۔

’طبیعت کی خرابی کے باعث وہ انتخابی ذمہ داریاں ادا نہیں کر سکتے، لہٰذا الیکشن کے عمل کو بلا تعطل جاری رکھنے کے لیے فوری طور پر کسی ڈسٹرکٹ اینڈ سیشن جج کو متبادل الیکشن کمشنر نامزد کیا جائے۔‘

خط میں واضح کیا گیا کہ انتخابات کی نگرانی کا معاملہ انتہائی فوری نوعیت کا ہے اور کسی بھی تاخیر سے انتخابی عمل متاثر ہو سکتا ہے۔

انتخابات میں پیش آنے والی رکاوٹ کے بعد کراچی بار ایسوسی ایشن کے ایک وفد نے صدر سندھ ہائیکورٹ بار ایسوسی ایشن بیرسٹر حسیب جمالی کے ہمراہ چیف جسٹس سندھ ہائیکورٹ، جسٹس ظفر احمد راجپوت سے ملاقات کی۔

ملاقات میں انتخابات کے تعطل، چیف الیکشن کمشنر کی غیر موجودگی اور متبادل تقرری کے معاملے پر تفصیلی گفتگو کی گئی، بعد ازاں رجسٹرار سندھ ہائیکورٹ کی جانب سے کراچی بار ایسوسی ایشن کو جوابی خط ارسال کیا گیا، جس کے مطابق کراچی بار کی درخواست چیف جسٹس سندھ ہائیکورٹ کے روبرو پیش کی گئی۔

تاہم چیف جسٹس نے احکامات جاری کیے کہ مذکورہ معاملہ ایڈمنسٹریشن کمیٹی سے متعلق ہے اور اسے یکطرفہ طور پر طے نہیں کیا جا سکتا، رجسٹرار نے اپنے خط میں واضح کیا کہ چیف جسٹس کے احکامات سے کراچی بار ایسوسی ایشن کو آگاہ کر دیا گیا ہے۔

ادھر کراچی بار ایسوسی ایشن کے دفتر کے باہر امیدوارانِ انتخابات کی جانب سے ایک احتجاجی مظاہرہ بھی کیا گیا، جس کی قیادت بیرسٹر سرفراز میتلو ایڈووکیٹ نے کی، مظاہرین نے الیکشن ملتوی کرنے کو ایک سازش قرار دیتے ہوئے کہا کہ وہ کئی ماہ سے انتخابات کی تیاری کر رہے تھے، تاہم دانستہ طور پر انتخابات موخر کرنے کی کوشش کی جا رہی ہے۔

کراچی بار ایسوسی ایشن کے الیکشن کے لیے نئی تاریخ مقرر
چیف جسٹس کے سامنے 23 تاریخ کی تجویز رکھی ہے، چیف جسٹس سے کہا ہے کہ دو افسران کا تقرر کریں، 23 تاریخ سے پہلے اس پر فیصلہ ہو جائے گا، چیف جسٹس نے یقین دہانی کرائی ہے، عامر نواز وڑائچ pic.twitter.com/wAxLCpKmIk

— Shahid Hussain (@ShahidHussainJM) December 19, 2025

مظاہرین کا کہنا تھا کہ وکلا برادری اس اقدام کی شدید مذمت کرتی ہے اور موجودہ کراچی بار کمیٹی انتخابات کرانے میں ناکام ہو چکی ہے، ان کے مطابق اس سے قبل بھی پاکستان بار کے انتخابات کا جواز بنا کر کراچی بار کے انتخابات ملتوی کیے گئے تھے۔ مظاہرین نے مطالبہ کیا کہ فوری طور پر انتخابات کرائے جائیں۔

کراچی بار ایسوسی ایشن کے صدر عامر نواز وڑائچ کا کہنا ہے کہ چیف الیکشن کمشنر کی طبیعت کی خرابی کے باعث پولنگ کا آغاز ممکن نہیں ہو سکا۔ انہوں نے بتایا کہ کراچی بار کی جانب سے رجسٹرار سندھ ہائیکورٹ کو متبادل چیف الیکشن کمشنر کی تقرری کے لیے خط لکھا جا چکا ہے اور اسی سلسلے میں چیف جسٹس سندھ ہائیکورٹ سے ملاقات بھی ہوئی ہے۔

صدر کراچی بار کے مطابق چیف جسٹس سندھ ہائی کورٹ نے واضح کیا ہے کہ چیف الیکشن کمشنر کی تقرری ایڈمنسٹریشن کمیٹی کا اختیار ہے اور وہ خود اس حوالے سے یکطرفہ فیصلہ نہیں کر سکتے، چیف جسٹس نے یہ بھی بتایا کہ ایڈمنسٹریشن کمیٹی کے بعض اراکین اس وقت دستیاب نہیں، جس کے باعث فوری فیصلہ ممکن نہیں ہو سکا۔

عامر نواز وڑائچ کے مطابق یہ ایک جمہوری عمل ہے اور ہم نے چیف جسٹس سندھ ہائیکورٹ کو آئندہ 3 دن کا وقت دیا ہے، امید ہے کہ یہ عمل جلد مکمل کر لیا جائے گا، ان کا کہنا تھا کہ ہار جیت سے ہٹ کر یہ ایک روایت اور طریقہ کار ہے، جس کا ہر صورت برقرار رہنا ضروری ہے۔

وکلا کے مطابق یہ مقابلہ وکلا کے دو بڑے دھڑوں کے درمیان ہے، ایک جانب سندھ ہائیکورٹ بار کے نو منتخب صدر کے حمایت یافتہ امیدوار عامر نواز وڑائچ ہیں، جبکہ دوسری جانب سابق صدر سندھ ہائیکورٹ بار ایسوسی ایشن بیرسٹر سرفراز میتلو کا گروپ ہے، جن کا امیدوار جے ایم کورائی ہے، جنہیں حال ہی میں ہائیکورٹ بار کے انتخابات میں شکست کا سامنا کرنا پڑا تھا۔

عدالتی ذرائع کے مطابق سرفراز میتلو کے حمایت یافتہ جے ایم کورائی کی جانب سے انتخابات موخر کرانے کی کوشش کی جا رہی تھی تاکہ نئی حکمتِ عملی ترتیب دے کر انتخابی کامیابی حاصل کی جا سکے۔ بعض وکلا میں یہ بے چینی بھی پائی جاتی ہے کہ چیف الیکشن کمشنر یعنی ڈسٹرکٹ اینڈ سیشن جج وسطی کے لیے کوئی متبادل پہلے سے مقرر نہیں تھا، جس کے باعث پورا انتخابی عمل رک گیا۔

وکلا ذرائع کا کہنا ہے کہ صوبائی حکومت سرفراز میتلو کی صورت میں سندھ ہائیکورٹ بار کی نشست سے محروم ہو چکی ہے، تاہم کراچی بار پر اثر و رسوخ حاصل کرنے کے لیے یہ کوششیں کی جا رہی ہیں۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں