چین کے مشرقی شہر جینان میں ڈاکٹروں نے ایک غیر معمولی اور نایاب طبی طریقہ اختیار کرتے ہوئے فیکٹری حادثے میں کٹ جانے والا خاتون کا کان عارضی طور پر اس کے پاؤں سے جوڑ دیا، جس کے بعد 5 ماہ کے علاج کے نتیجے میں کان کو دوبارہ اصل جگہ پر کامیابی سے نصب کر دیا گیا۔
میڈیا رپورٹ کے مطابق متاثرہ خاتون، جس کا خاندانی نام سن بتایا گیا ہے، تقریباً 5 ماہ قبل ایک فیکٹری میں کام کے دوران خوفناک حادثے کا شکار ہوئیں۔ دورانِ ڈیوٹی ان کے بال مشینری میں پھنس گئے، جس کے باعث سر اور گردن کی جلد شدید متاثر ہوئی اور بائیں جانب کا کان مکمل طور پر جسم سے الگ ہو گیا۔
یہ بھی پڑھیے: تین جوڑی جڑواں بھائی حجاج کی خدمت میں سرگرم، منفرد ریکارڈ قائم
حادثے کے فوراً بعد خاتون کو اسپتال منتقل کیا گیا، تاہم ڈاکٹروں نے معائنہ کے بعد بتایا کہ کان کے اردگرد خون کی نالیاں شدید طور پر متاثر ہو چکی ہیں، جس کے باعث روایتی طریقے سے کان کو دوبارہ جوڑنا ممکن نہیں تھا۔
علاج کی نگرانی کرنے والے ڈاکٹر کیو شین چیانگ کے مطابق، کان کو زندہ رکھنے کے لیے ڈاکٹروں نے مائیکرو سرجری کی ایک نایاب تکنیک ’ہیٹروٹوپک گرافٹنگ‘ استعمال کی۔ اس طریقے کے تحت کان کو عارضی طور پر خاتون کے دائیں پاؤں کے اگلے حصے سے جوڑ دیا گیا، جہاں جلد پتلی اور خون کی نالیاں زیادہ موزوں تھیں، تاکہ خون کی روانی برقرار رکھی جا سکے۔
ڈاکٹروں نے خاتون کو خصوصی احتیاطی تدابیر اختیار کرنے کی ہدایت کی، جن میں ڈھیلے جوتے پہننا اور جسمانی مشقت سے گریز شامل تھا، تاکہ نازک گرافٹ کو نقصان نہ پہنچے۔
یہ بھی پڑھیے: کنڈوم کی مدد سے معدے سے لائٹر نکالنے کا انوکھا طبی عمل
رپورٹ کے مطابق، 5 ماہ بعد شینڈونگ چیانفوشان اسپتال کے ماہر سرجنوں نے کان کو کامیابی سے اس کی قدرتی جگہ پر دوبارہ منتقل کر دیا۔
ٹانکے کھلنے کے بعد خاتون جذباتی ہو گئیں اور آنسوؤں کے ساتھ طبی ٹیم کا شکریہ ادا کیا، جنہوں نے ان کی سماعت اور ظاہری شناخت بحال کرنے میں کلیدی کردار ادا کیا۔
