پاکستان کے صوبہ پنجاب میں تعلیم کا شعبہ ہمیشہ سے ہی بحث کا موضوع رہا ہے اور خاص طور پر پرائیویٹ اسکولوں کی زیادہ فیسوں کا معاملہ کئی بار عدالتوں تک پہنچ چکا ہے۔
یہ بھی پڑھیں: نواز شریف اسکول آف ایمیننس: طلبا کے لیے مکمل فری ایجوکیشن پیکیج متعارف
ماضی میں والدین اور طلبہ کی جانب سے شکایات کی جاتی رہی ہیں کہ بیکن ہاؤس، لاہور گرامر اسکول اور دیگر نجی ادارے ماہانہ فیس 25 ہزار سے 50 ہزار روپے تک وصول کر رہے ہیں جو عام خاندانوں کے لیے ایک بڑا بوجھ ہے۔
ان اداروں کی فیسوں میں اضافے کو روکنے کے لیے قوانین موجود ہیں تاہم ان پر مؤثر عمل درآمد کا مسئلہ اب تک برقرار رہا ہے۔
سوشل میڈیا پر وائرل دعویٰ
حال ہی میں سوشل میڈیا پر ایک خبر تیزی سے گردش کر رہی ہے جس میں دعویٰ کیا جا رہا ہے کہ پنجاب حکومت نے بیکن ہاؤس، ایل جی ایس سمیت دیگر پرائیویٹ اسکولوں کی ماہانہ فیس کو صرف 10 ہزار روپے تک محدود کرنے کا فیصلہ کیا ہے۔
مزید پڑھیے: پنجاب میں اسکولوں کی چھٹیوں میں اضافہ کیوں کیا، وزیر تعلیم نے وجہ بتادی
اس کے علاوہ یہ بھی کہا جا رہا ہے کہ یہ فیصلہ جنوری 2026 سے نافذ العمل ہوگا جس سے لاکھوں طلبہ اور والدین کو ریلیف ملے گا۔
حکومتی مؤقف: خبر جعلی قرار
تاہم یہ دعویٰ مکمل طور پر غلط اور جعلی ثابت ہوا ہے۔
صوبائی وزیر تعلیم رانا سکندر حیات نے وی نیوز سے گفتگو کرتے ہوئے اس خبر کی سختی سے تردید کی ہے۔
انہوں نے واضح کیا کہ پنجاب حکومت نے پرائیویٹ اسکولوں کی فیسوں میں اس طرح کی کوئی کمی کرنے کا فیصلہ نہیں کیا۔
مزید پڑھیں: پنجاب: ورکرز ویلفیئر اسکولز کی بسوں میں کیمروں کی تنصیب کا آغاز
ان کا کہنا ہے کہ سوشل میڈیا پر چلنے والی یہ خبریں فیک ہیں اور عوام کو گمراہ کرنے کی کوشش کی جا رہی ہے۔
صوبائی وزیر تعلیم نے مزید کہا کہ حکومت تعلیم کے شعبے میں اصلاحات پر ضرور کام کر رہی ہے لیکن ماہانہ فیس کو 10 ہزار روپے تک محدود کرنے سے متعلق کوئی نوٹیفکیشن جاری نہیں کیا گیا۔
یہ بھی پڑھیے: پنجاب میں حالیہ سیلاب سے کتنے اسکولز تباہ ہوئے؟
رانا سکندر حیات نے عوام سے اپیل کی کہ وہ کسی بھی خبر پر یقین کرنے سے پہلے سرکاری ذرائع سے اس کی تصدیق ضرور کریں۔
جعلی خبروں کا تسلسل
یہ پہلا موقع نہیں کہ تعلیم کے شعبے سے متعلق جعلی خبریں پھیلائی گئی ہوں۔ پنجاب میں ماضی میں بھی اس نوعیت کی فیک خبروں کے باعث والدین، طلبہ اور تعلیمی اداروں میں بے چینی اور ابہام پیدا ہوتا رہا ہے۔
