پاکستان تحریک انصاف کے مرکزی رہنما و سابق وفاقی وزیر اطلاعات فواد چوہدری نے پی ٹی آئی سے راہیں جدا کر لی ہیں اور کہا ہے کہ میں فی الحال سیاست سے بریک لے رہا ہوں۔
سماجی رابطے کی ویب سائٹ پر اپنی ایک ٹوئٹ میں انھوں نے لکھا ہے کہ میں نے 9 مئی کو ہونے والے واقعات کی پہلے ہی مذمت کی تھی اور اب سیاست سے علیحدہ ہونے کا فیصلہ کیا ہے۔ میں پارٹی عہدوں سے مستعفی ہو رہا ہوں۔
Ref. My earlier statement where I unequivocally condemned 9th May incidents, I have decided to take a break from politics, therefore, I have resigned from party position and parting ways from Imran Khan
— Ch Fawad Hussain (@fawadchaudhry) May 24, 2023
واضح رہے کہ بدھ کے روز ہی یہ بات سامنے آئی تھی کہ پاکستان تحریک انصاف کے سینیئر رہنما فواد چوہدری اور فیصل واوڈا کے درمیان اسلام آباد میں اہم ملاقات ہوئی جس کے بعد یہ امکان ظاہر کیا جا رہا تھا کہ شاید فواد چوہدری تحریک انصاف کا حصہ نہ رہیں۔
ذرائع کے مطابق فواد چوہدری اور فیصل واوڈا کی ملاقات ایک گھنٹے تک جاری رہی اور اس کے بعد فیصل واوڈا فواد چوہدری کو لے کر ایک اہم شخصیت کے ساتھ ملاقات کے لیے روانہ ہو ئے تھے۔
واضح رہے کہ فواد چوہدری کا شمار عمران خان کے قریبی ساتھیوں میں ہوتا تھا اور اسی بنیاد پر انھیں پارٹی کا مرکزی سینیئر نائب صدر نامزد کیا گیا تھا۔
چیئرمین تحریک انصاف عمران خان کی القادر ٹرسٹ کرپشن کیس میں گرفتاری کے بعد فواد چوہدری کو 10 مئی کے روز سپریم کورٹ کے باہر سے ایم پی او کے تحت حراست میں لیا گیا تھا۔ اس کے بعد منگل 16 مئی کو اسلام آباد ہائی کورٹ نے پی ٹی آئی رہنما کی گرفتاری کو کالعدم قرار دے دیا تھا۔
یہ بھی پڑھیں تحریک انصاف کے سینیئر رہنما فواد چوہدری سپریم کورٹ کے باہر سے گرفتار
فواد چوہدری نے رہائی کے بعد میڈیا سے گفتگو کرتے ہوئے کہا تھا کہ سانحہ 9 مئی قابل مذمت ہے اس کے ذمہ داروں کو سزا ملنی چاہیے۔ پاک فوج ہے تو ہم ہیں۔
یہ بھی پڑھیں 9 مئی کے واقعات پر ہر پاکستانی رنجیدہ ہے، ذمہ داروں کو سزا ملنی چاہیے: فواد چوہدری
اس کے علاوہ یہ بھی یاد رہے کہ فواد چوہدری اپنی رہائی کے بعد سے میڈیا سے مکمل غائب رہے۔ رہائی کے بعد پارٹی چھوڑنے کے اعلان تک ان کی کوئی ٹوئٹ یا بیان سامنے نہیں آیا تھا۔
چیئرمین پی ٹی آئی عمران خان نے اپنی رہائی کے بعد ایک ٹوئٹ میں مرکزی رہنماؤں کے نام لے کر کہا تھا کہ حکومت کی جانب سے ہمارے مرکزی رہنماؤں کو گرفتار کیا گیا جو قابل مذمت ہے مگر پی ٹی آئی چیئرمین نے فواد چوہدری کا نام نہیں لیا تھا۔
عمران خان کی جانب سے پی ٹی آئی رہنماؤں کی گرفتاری کی مذمت کرنے کے دوران فواد چوہدری کا نام نہ لینے پر ان کی اہلیہ حبا فواد نے شکوہ کیا تھا کہ عمران خان صاحب! آپ فواد چوہدری کو کیوں بھول گئے ہیں؟
فواد چوہدری کے حوالے سے یہ بات بھی مشہور ہے کہ عمران خان کو پنجاب اور خیبر پختونخوا کی اسمبلیاں تحلیل کرنے کا مشورہ فواد چوہدری نے دیا تھا۔ اس حوالے سے پرویز الٰہی کی ایک مبینہ آڈیو بھی سامنے آئی تھی جس میں وہ نام لے کر کہہ رہے تھے کہ عمران خان نے فواد چوہدری کے کہنے پر اسمبلیاں توڑیں۔
