اداکارہ صبا قمر کے خلاف پولیس کی وردی پہن کر ویڈیو بنانے پر قانونی کارروائی کی درخواست سیشن عدالت میں دائر کر دی گئی ہے۔
درخواست شہری وسیم زوار کی جانب سے دائر کی گئی ہے جس میں مؤقف اختیار کیا گیا کہ صبا قمر نے ایک ویڈیو میں ایس پی کی وردی پہن کر قانون کی خلاف ورزی کی ہے۔
درخواست میں کہا گیا کہ پولیس کی وردی پہننا قانوناً ممنوع ہے اور اس اقدام سے پنجاب پولیس کے مورال اور ادارے کی ساکھ کو نقصان پہنچا ہے۔
یہ بھی پڑھیں: صبا قمر سے متعلق سب سچ کہا، مزید حقائق بھی سامنے لاؤں گا، لیگل نوٹس پر صحافی کا جواب
درخواست گزار نے مزید موقف اختیار کیا کہ اس معاملے پر پولیس کو آگاہ کیا گیا لیکن تاحال کوئی کارروائی عمل میں نہیں لائی گئی۔
سیشن عدالت نے ابتدائی سماعت کے بعد تھانہ پرانی انارکلی سے رپورٹ طلب کر لی ہے اور استدعا کی گئی ہے کہ اداکارہ کے خلاف مقدمہ درج کرنے کا حکم دیا جائے۔ عدالت آئندہ سماعت پر پولیس رپورٹ پیش کیے جانے کے بعد مزید کارروائی کرے گی۔
