مسلح افواج مکمل تیار، دشمن کسی غلط فہمی میں نہ رہے: ایرانی صدر

ایران کے صدر مسعود پزشکیان نے خبردار کیا ہے کہ ایران کے خلاف کسی بھی قسم کی جارحیت کا اس سے کہیں زیادہ فیصلہ کن جواب دیا جائے گا، اور کہا کہ مسلح افواج دشمنوں اور ان کی دھمکیوں کا مقابلہ کرنے کے لیے مکمل طور پر تیار ہیں۔

ہفتے کے روز دفترِ تحفظ و اشاعتِ آثارِ رہبرِ انقلاب اسلامی کی ویب سائٹ کو دیے گئے انٹرویو میں صدر پزشکیان نے داخلی امور کے ساتھ ساتھ ایران مخالف بیانات اور پروپیگنڈے پر بھی کھل کر بات کی۔

امریکی اور اسرائیلی جارحیت کے امکان سے متعلق ایک سوال کے جواب میں صدر نے کہا کہ ایرانی افواج اسلحے اور افرادی قوت کے لحاظ سے مکمل طور پر تیار ہیں اور پہلے سے کہیں زیادہ مضبوط ہو چکی ہیں، تاکہ کسی بھی شرپسندانہ اقدام کا بھرپور اور فیصلہ کن جواب دیا جا سکے۔

یہ بھی پڑھیے ایرانی صدر پزشکیان کا دورہ پاکستان، سی پیک میں شمولیت، تجارتی ہدف بڑھانے کی خواہش ظاہر کردی

صدر پزشکیان نے ایک بار پھر قومی اتحاد پر زور دیتے ہوئے کہا کہ دشمنوں کی سازشوں کو ناکام بنانے کے لیے عوام کا متحد رہنا انتہائی ضروری ہے۔ ان کا کہنا تھا:
’اگر ہم سب ایک ساتھ اور متحد رہیں تو دشمن ہمارے ملک پر حملے کا سوچنے کی بھی جرات نہیں کرے گا۔‘

انہوں نے جون میں ایران کے خلاف ہونے والی 12 روزہ امریکی اسرائیلی جارحیت کے دوران قوم کے اتحاد اور یکجہتی کا حوالہ دیتے ہوئے کہا کہ اس عرصے میں حکومتی امور معمول کے مطابق چلتے رہے اور عوام و حکام کے درمیان مکمل تعاون اور ہم آہنگی موجود تھی۔

ایران کو کمزور دکھانے کے لیے کی جانے والی نفسیاتی جنگ پر بات کرتے ہوئے صدر پزشکیان نے کہا کہ دشمنوں کی میڈیا مہمات کسی نتیجے تک نہیں پہنچیں گی۔

’وہ اپنی خیالی دنیا میں رہیں، انہوں نے ہمیں اسی غلط فہمی کے تحت نشانہ بنایا، مگر اس کا نتیجہ اندرونی اتحاد میں اضافے کی صورت میں نکلا۔‘

انہوں نے ایرانی سپریم لیڈر کے اس بیان کا حوالہ دیتے ہوئے کہ ’کوئی طاقت اس قوم کو شکست نہیں دے سکتی جو متحد ہو‘۔

یہ بھی پڑھیے جوہری تنصیبات پہلے سے زیادہ مضبوطی کے ساتھ دوبارہ تعمیر کریں گے، ایرانی صدر کا اعلان

صدر نے کہا کہ ان کے نزدیک کسی بھی فوجی طاقت سے بڑھ کر اہم چیز قومی اتحاد، اختلافات کو پسِ پشت ڈالنا اور مسائل کے حل کے لیے مل کر کام کرنا ہے۔

صدر پزشکیان نے ملکی معیشت، آئندہ سال کے بجٹ اور عوام کو درپیش مالی مشکلات پر بھی بات کی۔ انہوں نے بتایا کہ ان کی حکومت عوام کے معیارِ زندگی کو بہتر بنانے کے لیے 20 نکاتی منصوبے پر عمل پیرا ہے۔

انہوں نے مزید کہا کہ اس منصوبے کو مختلف معاشی کمیٹیوں اور اداروں کے سامنے پیش کیا گیا ہے تاکہ کرنسی، اشیائے ضروریہ، مہنگائی اور دیگر متعلقہ مسائل پر مشترکہ حکمتِ عملی کے تحت کام کیا جا سکے۔