چین نے بچوں کے تحفظ اور مصنوعی ذہانت کے محفوظ استعمال کو یقینی بنانے کے لیے اے آئی کمپنیوں کے خلاف سخت نئے قوانین متعارف کرانے کی تجاویز مرتب کرلیں۔
یہ بھی پڑھیں: ہر معاملے میں مصنوعی ذہانت سے رجوع انسان کی ذہنی صلاحیت کس طرح متاثر کرتا ہے؟
بی بی سی کے مطابق مجوزہ قواعد کے تحت چیٹ بوٹس کو ایسا مواد فراہم کرنے سے روکا جائے گا جو بچوں کے لیے نقصان دہ ہو یا تشدد کی طرف مائل کرے۔
چینی حکام کے مطابق اے آئی تیار کرنے والی کمپنیوں کو اس بات کو یقینی بنانا ہوگا کہ ان کے ماڈلز جوا یا دیگر نقصان دہ سرگرمیوں کو فروغ دینے والا مواد تیار نہ کریں۔
یہ اعلان ایسے وقت میں سامنے آیا ہے جب چین اور دنیا بھر میں چیٹ بوٹس کی تعداد میں تیزی سے اضافہ ہو رہا ہے۔
چین کی سائبر اسپیس ایڈمنسٹریشن کی جانب سے جاری کردہ مسودہ قوانین کے مطابق اے آئی مصنوعات اور سروسز پر سخت نگرانی کی جائے گی۔
ان قوانین میں بچوں کے تحفظ کے لیے خصوصی اقدامات شامل ہیں جن کے تحت اے آئی کمپنیوں کو ذاتی نوعیت کی سیٹنگز، استعمال کے وقت کی حد اور جذباتی معاونت فراہم کرنے سے قبل سرپرست کی اجازت لینا ہوگی۔
مزید پڑھیے: کیا ہم خبروں کے حوالے سے مصنوعی ذہانت پر اعتبار کرسکتے ہیں؟
قواعد کے مطابق اگر کسی چیٹ بوٹ پر حساس نوعیت کی گفتگو سامنے آئے تو انسانی نمائندے کو فوراً مداخلت کرنا ہوگی اور صارف کے سرپرست یا متعلقہ ذمہ دار فرد کو اطلاع دینا لازم ہوگا۔
بیان میں کہا گیا ہے کہ اے آئی سروسز کو ایسا مواد تیار یا پھیلانے سے بھی روکا جائے گا جو قومی سلامتی، قومی وقار یا قومی یکجہتی کے خلاف ہو۔
سائبر اسپیس ایڈمنسٹریشن نے واضح کیا کہ حکومت محفوظ اور قابلِ اعتماد اے آئی کے فروغ کی حوصلہ افزائی کرتی ہے خاص طور پر ایسے منصوبے جو مقامی ثقافت کے فروغ یا بزرگوں کے لیے معاونت فراہم کریں۔ اس کے ساتھ ساتھ عوام سے مسودہ قوانین پر رائے بھی طلب کی گئی ہے۔
واضح رہے کہ رواں سال چینی اے آئی کمپنی ڈیپ سیک نے عالمی سطح پر خاصی توجہ حاصل کی جبکہ 2 دیگر چینی اسٹارٹ اپس زیڈ اے آئی اور مینی میکس نے اسٹاک مارکیٹ میں فہرست ہونے کے منصوبوں کا اعلان کیا ہے۔
مزید پڑھیں: ٹائم میگزین نے مصنوعی ذہانت کے معماروں کو رواں سال کا ‘پرسن آف دی ایئر’ قرار دے دیا
ماہرین کے مطابق اے آئی ٹیکنالوجی کے انسانی رویّوں پر اثرات کے حوالے سے عالمی سطح پر تشویش بڑھ رہی ہے جس کے پیش نظر چین کا یہ اقدام مصنوعی ذہانت کے محفوظ استعمال کی جانب ایک اہم قدم قرار دیا جا رہا ہے۔
