عالمی سرمایہ کاروں کا پاکستان پر اعتماد بحال ہونے لگا ہے اور ملک نے 2026 کا آغاز مضبوط معاشی اشاروں کے ساتھ کیا ہے۔
ویون گروپ کی جانب سے موبی لنک بینک میں سرمایہ کاری رواں سال کی پہلی براہِ راست غیر ملکی سرمایہ کاری قرار دی جا رہی ہے، جو پاکستان کے معاشی استحکام اور اصلاحاتی عمل پر عالمی اعتماد کی عکاس ہے۔
یہ بھی پڑھیے: پاکستان میں سماجی سرمایہ کاری کے نئے مالیاتی فریم ورک کا اجرا
ماہرین کے مطابق غیر ملکی سرمایہ کاری کا یہ قدم اس بات کی علامت ہے کہ پاکستان میں بہتر ضابطہ کاری، معاشی استحکام اور حکومتی اصلاحات نے عالمی سرمایہ کاروں کو متوجہ کیا ہے۔ خاص طور پر ڈیجیٹل بینکاری، مالی شمولیت اور اسلامی فنانس جیسے شعبے عالمی سطح پر سرمایہ کاروں کی توجہ کا مرکز بنتے جا رہے ہیں۔
اقتصادی حلقوں کا کہنا ہے کہ ویون گروپ کی سرمایہ کاری استحکام سے ترقی کے سفر کی توثیق کرتی ہے اور اس سے پاکستان کی عالمی سرمایہ کاری ساکھ مزید مضبوط ہوگی۔ غیر ملکی سرمایہ کاری پائیدار اور ترقی پر مبنی معاشی نمو کو سہارا دیتی ہے جبکہ مالی شمولیت اور ڈیجیٹل معیشت کو طویل مدتی بنیادوں پر تقویت ملنے کی توقع ہے۔
یہ بھی پڑھیے: مقامی سرمایہ کاروں کے آگے آنے سے بیرونی سرمایہ کاری بھی آئےگی، وزیر خزانہ
تجزیہ کاروں کے مطابق سرمایہ کاروں کا یہ اعتماد حکومتی اصلاحات کی تصدیق ہے اور ایک مثبت اشارہ ہے جو مستقبل میں مزید غیر ملکی سرمایہ کاری کے امکانات بڑھا سکتا ہے۔
واضح رہے کہ عالمی ڈیجیٹل آپریٹر ویون گروپ (VEON Group) نے پاکستان میں موبی لنک بینک کی ترقی اور ڈیجیٹل اسلامی بینکنگ کے فروغ میں معاونت کے لیے 20 ملین ڈالرز کی سرمایہ کاری کا اعلان کیا ہے۔
