آسٹریلیا کے سابق جارح مزاج وکٹ کیپر بلے باز ایڈم گلکرسٹ نے پاکستانی بیٹر بابر اعظم کی سست بیٹنگ پر تبصرہ کرتے ہوئے کہا ہے کہ اس انداز سے بعض اوقات دوسرے اینڈ پر موجود کھلاڑی پر اضافی دباؤ پڑ جاتا ہے۔
مزید پڑھیں: بابر اعظم کی شاندار نصف سنچری، سڈنی سکسز کی رینیگیڈز پر فتح
آسٹریلیا میں کھیلی جانے والی بگ بیش لیگ (بی بی ایل) کے دوران کمنٹری کرتے ہوئے گلکرسٹ کا کہنا تھا کہ بابر اعظم پاور ہٹنگ کے حوالے سے نہیں بلکہ اپنی نفیس ٹائمنگ اور شاندار تکنیک کی وجہ سے جانے جاتے ہیں۔
انہوں نے کہاکہ بابر کی اصل پہچان ان کی ٹائمنگ، کلاس اور تکنیکی مہارت ہے، اس لیے ان سے ہر گیند پر جارحانہ شاٹس یا بڑے چھکوں کی توقع کرنا مناسب نہیں۔ تاہم محدود اوورز کی کرکٹ میں انہیں مزید مثبت اور فعال کردار ادا کرنے کی ضرورت ہے۔
ایڈم گلکرسٹ کے مطابق اگر کوئی بیٹر مسلسل ایک گیند پر ایک رن تک محدود رہے اور رنز بنانے کی ذمہ داری دوسرے کھلاڑی پر چھوڑ دے تو یہ حکمتِ عملی ٹیم کے لیے نقصان دہ ثابت ہو سکتی ہے۔
ان کا کہنا تھا کہ بابر اعظم کو میچ کی صورتحال کے مطابق اسٹرائیک گھمانے، فیلڈ میں خالی جگہوں کا فائدہ اٹھانے اور درست وقت پر شاٹس کھیل کر دباؤ کم کرنا چاہیے۔
مزید پڑھیں: بگ بیش لیگ، بابر اعظم کی دوسرے میچ میں بھی مایوس کن کارکردگی، شائقین کی تنقید
گلکرسٹ نے مزید کہاکہ اگر بابر اپنی فطری بیٹنگ میں تھوڑی سی جارحیت شامل کر لیں تو وہ ٹیم کے لیے اور بھی زیادہ فائدہ مند ثابت ہو سکتے ہیں۔
