سال 2026 کا پہلا سپر مون آسمان پر نمودار ہو گیا ہے، جس میں چاند غیر معمولی طور پر بڑا اور روشن دکھائی دے گا۔ فلکیات میں اس سپر مون کو روایتی طور پر ’وولف مون‘ کہا جاتا ہے۔
یہ سپر مون دراصل گزشتہ سال اکتوبر 2025 کے آغاز ہونے والے سپر مون کا اختتام بھی ہے اور سال 2026 کا پہلا فلکیاتی مظاہرہ بھی شمار ہوتا ہے۔
مزید پڑھیں: سال 2026 کا پہلا سپر مون پاکستان میں کب نظر آئے گا؟
ماہرین کے مطابق یہ واقعہ فلکیاتی اعتبار سے اہمیت کا حامل ہے کیونکہ اسی دوران کواڈرینٹڈ شہابی بارش اپنی شدت پر پہنچتی ہے۔
پاکستان میں یہ سپر مون شام 5 بجکر 51 منٹ پر طلوع ہوا، جس وقت چاند کی روشنی تقریباً 99.8 فیصد ہوگی۔ ماہرین کے مطابق یہ مظہر 3 اور 4 جنوری کی راتوں میں سب سے واضح دیکھا جا سکتا ہے۔
زمین اور چاند کے درمیان موجود فاصلہ تقریباً 3 لاکھ 62 ہزار 312 کلومیٹر ہے، اور سپر مون عام چاند کے مقابلے میں تقریباً 6 سے 7 فیصد بڑا اور 10 فیصد تک زیادہ روشن دکھائی دے گا۔
مزید پڑھیں: پاکستان سمیت دنیا کے مختلف ممالک میں سپر مون کا خوبصورت نظارہ
فلکیات کے ماہرین نے بتایا کہ سپر مون عموماً 3 سے 4 مسلسل وقوعات کے بعد نمودار ہوتے ہیں، اور موجودہ سپر مون کا سلسلہ 3 جنوری کے سپر مون کے ساتھ اختتام پذیر ہو رہا ہے۔ اگلا سپر مون نومبر 2026 میں متوقع ہے، جو سال کا دوسرا اور آخری سپر مون ہوگا۔
