اسپیس اینڈ اپر ایٹموسفیر ریسرچ کمیشن (سپارکو) کے مطابق سال 2026 کا پہلا سپر مون، جسے روایتی طور پر وولف مون کہا جاتا ہے، 3 اور 4 جنوری کو پاکستان میں دیکھا جا سکے گا۔
یہ بھی پڑھیں: پاکستان سمیت دنیا کے مختلف ممالک میں سپر مون کا خوبصورت نظارہ
سپارکو کی جانب سے جمعے کو جاری بیان میں کہا گیا ہے کہ سپر مون اس وقت بنتا ہے جب چاند اپنے بیضوی مدار میں زمین کے سب سے قریب آ جاتا ہے جس کے باعث وہ معمول کے پورے چاند کے مقابلے میں زیادہ بڑا اور روشن دکھائی دیتا ہے۔
سپر مون عام فل مون کے مقابلے میں تقریباً 14 فیصد بڑا اور قریباً 30 فیصد زیادہ روشن نظر آ سکتا ہے۔
بیان کے مطابق پاکستان میں یہ سپر مون 3 جنوری کی شام 5 بج کر 51 منٹ (پاکستانی وقت) پر طلوع ہوگا جبکہ اس وقت چاند کی روشنی کی شدت 99.8 فیصد ہوگی۔ یہ نظارہ 3 اور 4 جنوری کی رات بھر دیکھا جا سکے گا۔
مزید پڑھیے: سپر بلڈ مون: پاکستان سمیت دنیا کے مختلف ممالک میں چاند گرہن
سپارکو کے مطابق اس موقعے پر زمین اور چاند کے درمیان فاصلہ تقریباً 3 لاکھ 62 ہزار 312 کلومیٹر ہوگا، جس کے باعث چاند معمول کے فل مون کے مقابلے میں تقریباً 6 سے 7 فیصد بڑا اور 10 فیصد زیادہ روشن دکھائی دے گا۔
یہ سپر مون اکتوبر 2025 میں شروع ہونے والے سپر مونز کے سلسلے کا آخری مظہر بھی ہوگا۔
عام طور پر سپر مونز 3 سے 4 مسلسل مواقع پر نمودار ہوتے ہیں، جبکہ موجودہ سلسلہ 3 جنوری کے سپر مون کے ساتھ اختتام پذیر ہو رہا ہے۔ اگلا سپر مون سائیکل نومبر 2026 میں شروع ہوگا۔
مزید پڑھیں: پاکستان میں 2025 کا آخری سُپرمون، شائقین فلکیات کو مسحور کرگیا
سپارکو کے مطابق سنہ 2025 میں پاکستان میں پہلا سپر مون 7 اکتوبر کو دیکھا گیا، دوسرا 5 نومبر کو بیور (اودبلاؤ) سپر مون کے نام سے ظاہر ہوا جبکہ سال کا آخری سپر مون 4 اور 5 دسمبر کو ملک بھر میں دیکھا گیا تھا۔
