اسلام آباد میں بلدیاتی انتخابات کا شیڈول واپس لے لیا گیا ہے۔ الیکشن کمیشن آف پاکستان نے وفاقی دارالحکومت میں بلدیاتی الیکشن پروگرام منسوخ کرنے کا باضابطہ نوٹیفکیشن جاری کر دیا۔
نوٹیفکیشن کے مطابق حکومت نے 10 جنوری کو اسلام آباد کے لیے بلدیاتی حکومت ترمیمی آرڈیننس جاری کیا، جس کے تحت وفاقی دارالحکومت میں مقامی حکومت کے ڈھانچے میں تبدیلی کی گئی ہے۔
انتخابی نظام میں تبدیلی، الیکشن کمیشن کا اقدام
الیکشن کمیشن کا کہنا ہے کہ ترمیمی آرڈیننس کے ذریعے مقامی حکومتوں کے انتخابات کے طریقہ کار (موڈ) میں بھی تبدیلی کی گئی ہے، جس کے باعث موجودہ انتخابی شیڈول پر عمل ممکن نہیں رہا۔
یہ بھی پڑھیے جماعت اسلامی نے اسلام آباد بلدیاتی آرڈیننس ہائیکورٹ میں چیلنج کردیا
اسی بنیاد پر الیکشن کمیشن نے اسلام آباد میں مقامی حکومتوں کے انتخابات کا اعلان کردہ پروگرام واپس لینے کا فیصلہ کیا ہے۔
15 فروری کو الیکشن ہونا تھے
واضح رہے کہ الیکشن کمیشن نے اس سے قبل 15 فروری کو اسلام آباد میں بلدیاتی انتخابات کے انعقاد کے لیے شیڈول جاری کیا تھا، تاہم تازہ حکومتی اقدام کے بعد اب یہ شیڈول مؤثر نہیں رہا۔
