چترال کی وادی کیلاش سے تعلق رکھنے والی سائرہ جبین قومی ویمن کرکٹ ٹیم میں منتخب ہو کر تاریخ ساز بن گئی ہیں۔ وہ پاکستان کی نمائندگی کرنے والی چترال کی پہلی خاتون کرکٹر ہیں، جن کا جنوبی افریقہ کے خلاف ٹی 20 اسکواڈ میں انتخاب نہ صرف ذاتی کامیابی بلکہ دور دراز علاقوں کی خواتین کے لیے ایک بڑی پیش رفت قرار دیا جا رہا ہے۔
یہ بھی پڑھیں:قومی ویمن کرکٹر سدرہ نواز شادی کے بندھن میں بندھ گئیں، دلہا کون ہے؟
سائرہ جبین نے قومی ٹیم میں شمولیت حاصل کر کے پاکستان کی کھیلوں کی تاریخ میں ایک نیا باب رقم کر دیا ہے۔ وادی کیلاش کے گاؤں رمبور سے تعلق رکھنے والی سائرہ کا سفر جغرافیائی مشکلات، محدود سہولیات اور سماجی رکاوٹوں کے باوجود عزم اور محنت کی ایک نمایاں مثال ہے۔
کرکٹ کے شعبے میں آگے بڑھنے کے لیے سائرہ جبین نے آسٹریلیا میں ایک کرکٹ کلب کی نمائندگی بھی کی، جہاں انہیں بین الاقوامی معیار کی کرکٹ کھیلنے اور سیکھنے کا موقع ملا۔ اس تجربے نے ان کی تکنیکی اور مسابقتی صلاحیتوں کو نکھارا، جو اب قومی سطح پر ان کے انتخاب کی بنیاد بنا۔
یہ بھی پڑھیں:زلمی ویمن کرکٹ لیگ میں ڈرامائی صورتحال، ڈی آئی خان کے آخری گیند پر 9 رنز، دلچسپ ویڈیو وائرل
پاکستان ویمن کرکٹ ٹیم کے لیے جنوبی افریقہ کے خلاف ٹی 20 اسکواڈ میں ان کی شمولیت کو ابھرتے ہوئے ٹیلنٹ کے حوالے سے ادارہ جاتی اعتماد اور اعتراف کی علامت قرار دیا جا رہا ہے۔ یہ پیشرفت نہ صرف ویمن کرکٹ میں علاقائی نمائندگی کے دائرۂ کار کو وسیع کرتی ہے بلکہ اس بات کی بھی نشاندہی کرتی ہے کہ پاکستان میں کھیلوں کے میدان میں شمولیت کا رجحان بڑھ رہا ہے۔
سائرہ جبین کی کامیابی چترال اور وادی کیلاش کے لیے فخر کا لمحہ ہے، جبکہ یہ دور افتادہ اور پسماندہ علاقوں کی نوجوان لڑکیوں کے لیے ایک واضح پیغام بھی ہے کہ عزم، محنت اور ہمت کے ساتھ روایتی حدود سے آگے بڑھا جا سکتا ہے۔
