وزیراعلیٰ پنجاب مریم نواز نے اعلان کیا ہے کہ بسنت کے دوران کسی بھی ممکنہ حادثات سے بچاؤ کے لیے موٹرسائیکل سواروں کو سیفٹی راڈز مفت فراہم کی جائیں گی۔
یہ بھی پڑھیں: بسنت پر پارکوں میں پتنگ بازی پر پابندی، لاہور میں ڈیجیٹل نگرانی کا فیصلہ
بسنت فیسٹیول پر جائزہ اجلاس سے خطاب کرتے ہوئے وزیراعلیٰ نے کہا کہ پنجاب حکومت 10 لاکھ موٹر سائیکل سواروں کو سیفٹی راڈ مفت فراہم کرے گی تاکہ وہ تہوار کے دوران پتنگوں کی ڈور سے کسی حادثے کا شکار ہونے سے بچ سکیں۔
ان کا کہنا ہے کہ بسنت 500 سال پرانا تہوار اور پنجاب کی ثقافت کا حصہ ہے تاہم اس کے لیے مانیٹرنگ سمیت ہر لحاظ سے جامع پلان گیا ہے۔
مریم نواز نے کہا کہ بسنت 6 تا 8 فروری منائی جائے گی جس کے دوران پنجاب کی ثقافت کو بھرپور طریقے سے اجاگر کریں گے۔ انہوں نے مزید کہا کہ سیفٹی پلان کے لیے لاہور کو 3 حصوں میں تقسیم کیا گیا ہے۔
مزید پڑھیے: لاہور میں بسنت کی تیاریاں شروع، پتنگوں اور ڈوروں کی قواعد و ضوابط کے تحت تیاری
وزیراعلیٰ پنجاب نے خبردار کیا کہ ڈور اور پتنگ کے سائز کی خلاف ورزی پر سخت سزا ہوگی۔
انہوں نے کہا کہ ماضی میں لوگوں کو تفریح سے محروم کیا گیا تھا لیکن اب ہم ایک محفوظ تہوار مناکر عوام کو تفریح کا موقع فراہم کریں گے۔
مزید پڑھیں: بسنت 2026 کے لیے لاہور میں سخت سیکیورٹی انتظامات، پولیس نے تفصیلی پلان عدالت میں پیش کر دیا
مریم نواز نے بتایا کہ بسنت کے لیے ٹرانسپورٹ کا ایک شاندار پلان مرتب کیا گیا ہے اور لاہور کے شہریوں کو اس دوران مفت سواری کی سہولت فراہم کی جائے گی۔
