کرتارپور اور ننکانہ صاحب موٹر ویز سے منسلک، ’گرو نانک ایکسپریس وے‘ تعمیر کی منظوری

نیشنل ہائی وے اتھارٹی (این ایچ اے) نے سکھوں کے مقدس مقامات کرتارپور اور ننکانہ صاحب کو موٹر وے نیٹ ورک سے منسلک کرنے کا اہم اور تاریخی فیصلہ کرلیا ہے۔ وفاقی وزیرِ مواصلات عبدالعلیم خان نے سیالکوٹ سے کرتار پور موٹر وے کی تعمیر کے لیے فوری طور پر کام شروع کرنے کی ہدایت جاری کر دی ہے۔

وفاقی وزیر نے اعلان کیا کہ نئی تعمیر ہونے والی موٹر وے کو ’گرو نانک ایکسپریس وے‘ کے نام سے منسوب کیا جائے گا۔ ان کا کہنا تھا کہ کرتارپور ہائی وے کے اطراف تھری، فور اور فائیو اسٹار ہوٹلوں کی تعمیر کی جائے گی تاکہ ملکی و غیر ملکی یاتریوں کو جدید سہولیات فراہم کی جا سکیں۔

این ایچ اے: کرتار پور اور ننکانہ صاحب کو موٹر ویز سے منسلک کرنے کا فیصلہ
سیالکوٹ سے کرتار پور موٹروے کی تعمیر کے لئے کام شروع کریں، نئی موٹر وے کو گرو نانک ایکسپریس وے کے نام سے منسوب کریں گے، وفاقی وزیرِ مواصلات عبدالعلیم خان @AajKamranKhan @KulAalam @alihamzaisb pic.twitter.com/W3xHAbSTbb

— Media Talk (@mediatalk922) January 29, 2026

عبدالعلیم خان نے بتایا کہ سکھ کمیونٹی کی سرمایہ کاری کو راغب کرنے کے لیے لندن، کینیڈا اور امریکہ میں اشتہاری مہم چلائی جائے گی، جبکہ این ایچ اے سکھوں کے مقدس مقامات کی عالمی سطح پر مؤثر مارکیٹنگ بھی کرے گا۔

وفاقی وزیرِ مواصلات کا کہنا تھا کہ ننکانہ صاحب اور کرتارپور سے متعلق این ایچ اے کے منصوبے گیم چینجر ثابت ہوں گے۔ انہوں نے این ایچ اے کو ہدایت دی کہ ان منصوبوں کو عالمی روڈ شوز کا حصہ بنایا جائے تاکہ بین الاقوامی سرمایہ کاروں کی دلچسپی حاصل کی جا سکے۔

انہوں نے مزید کہا کہ این ایچ اے موٹر وے کے ساتھ بہترین ریسٹ ایریاز اور جدید شاپنگ مالز کی تعمیر بھی یقینی بنائے گا۔ سیالکوٹ سے کرتارپور موٹر وے نہ صرف یاتریوں بلکہ دیگر منسلک شہروں کے لیے بھی فائدہ مند ثابت ہو گی، جس سے نارنگ منڈی اور بدوملہی کے شہری بھی مستفید ہوں گے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں