لیبیا کی مسلح افواج کے نائب کمانڈر کی فضائیہ سربراہ سے ملاقات، دفاعی تعاون مضبوط کرنے پر تبادلہ خیال

لیبیا کی عرب مسلح افواج کے نائب کمانڈر اِن چیف لیفٹیننٹ جنرل صدام خلیفہ حفتر کی قیادت میں اعلیٰ سطحی دفاعی وفد نے ایئر ہیڈکوارٹرز اسلام آباد میں سربراہ پاک فضائیہ ایئر چیف مارشل ظہیر احمد بابر سدھو سے ملاقات کی۔

ترجمان کے مطابق ملاقات کے دوران باہمی دلچسپی کے امور، بدلتی ہوئی علاقائی سلامتی کی صورتحال اور دوطرفہ عسکری تعاون کو مزید مضبوط بنانے کے امکانات پر تفصیلی تبادلۂ خیال کیا گیا۔

سربراہ پاک فضائیہ نے پاکستان اور لیبیا کے درمیان گہرے مذہبی اور تاریخی تعلقات کو اجاگر کرتے ہوئے پاک فضائیہ کی اعلیٰ آپریشنل تیاری، تکنیکی جدت اور ملٹی ڈومین صلاحیتوں پر روشنی ڈالی۔

ایئر چیف نے وفد کو پاک فضائیہ کی خود انحصاری، انسانی وسائل کی تربیت اور پیشہ ورانہ مہارت کے تبادلے کے عزم سے بھی آگاہ کیا اور لیبیا کی فضائیہ کی صلاحیتوں میں اضافے کے لیے بھرپور تعاون کی یقین دہانی کرائی۔

لیفٹیننٹ جنرل صدام خلیفہ حفتر نے پاک فضائیہ کے افسران اور جوانوں کی پیشہ ورانہ مہارت کو سراہا اور مشترکہ تربیتی اقدامات، عسکری مشقوں اور پیشہ ورانہ تبادلے کے پروگراموں کے ذریعے دوطرفہ دفاعی تعاون کو بڑھانے کی خواہش کا اظہار کیا۔

ملاقات کے دوران نیشنل ایرو اسپیس سائنس اینڈ ٹیکنالوجی پارک کے ذریعے پاک فضائیہ کے اقدامات اور پاکستان میں خود انحصاری پر مبنی ایرو اسپیس ماحولیاتی نظام کی ترقی پر بھی روشنی ڈالی گئی۔

ایئر ہیڈکوارٹرز میں لیبیائی وفد کا یہ دورہ دونوں ممالک کے مابین دفاعی تعاون اور باہمی اعتماد کو مضبوط کرنے کی ایک مثبت پیش رفت کے طور پر دیکھا جا رہا ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں