پاکستان تحریک انصاف (پی ٹی آئی) سے تعلق رکھنے والے سینیٹرز نے 9 مئی کے واقعات کی بھرپور مذمت کرتے ہوئے کہا کہ سرکاری املاک اور فوجی تنصیبات کو نقصان پہنچانے والے عناصر کے خلاف کارروائی ہونی چاہیے اور ملوث افراد کو قرار واقعی سزا ملنی چاہیے۔
اسلام آباد پارلیمنٹ ہاؤس کے باہر پی ٹی آئی کے سینیٹرز فیصل سلیم، ذیشان خانزادہ، سیمی ایزدی، ڈاکٹر زرقا تیمور، ڈاکٹر ہمایوں، فلک ناز چترالی اور سینیٹر سیف اللہ نیازی نے پریس کانفرنس کرتے ہوئے 9 مئی کے واقعے کی بھرپور مذمت کی اور کہا کہ ہمارے خاندانوں کا تعلق فوج سے ہے ہم ان کی قربانیوں کی قدر کرتے ہیں۔
سینیٹر فیصل سلیم نے نے کہا کہ ہم نے سینیٹ میں ایک قرارداد جمع کرائی تھی جس میں 9 مئی کے واقعات کی بھرپور مذمت کی گئی، دفاعی تنصیبات اور سرکاری املاک کو نشانہ بنایا گیا جس پر بحیثیت قوم ہم بہت شرمندہ ہیں۔
سینیٹر سیمی ایزدی نے کہا کہ میرا خاندان آرمی سے تعلق رکھتا ہے، ہم تصور بھی نہیں کر سکتے کہ کوئی آرمی تنصیبات پر حملہ کرے، جو لوگ اس واقعے میں ملوث ہیں ان کو سزا ملنی چاہیے۔
مزید پڑھیں
سینیٹر فلک ناز نے کہا کہ 9 مئی کا دن میری زندگی کا سب سے منحوس دن ہے، اسی دن میں نے اپنے والد کو کھویا ہے، اور اسی دن پاکستان کے شہدا کی یادگار اور املاک کو نقصان پہنچانے کی کوش کی گئی ہے، جس کو ہم مسترد کرتے ہیں۔
’میرا بھائی فوج میں حاضر سروس ہے، اور بھتیجے نے فوج میں رہتے ہوئے قوم کے لیے جان دی۔‘
سینیٹر ڈاکٹر زرقا سہروردی نے کہا کہ 9 مئی کو جو ہوا، ہم اس کی شدید مذمت کرتے ہیں۔ ہم سب سے پہلے پاکستانی ہیں اور اس کے بعد باقی سب کچھ آتا ہے۔ واقعے میں ملوث لوگوں کو سزا ملنی چاہیے لیکن جو لوگ بے گناہ ہیں ان کو رہا کیا جانا چاہیے، اور ملٹری کورٹس کے بجائے سول عدالتوں میں مقدمے چلنے چاہئیں۔
انہوں نے کہا کہ رانا ثنا اللہ نے اس دن پریس کانفرنس کی جس پر تشویش ہے، جیل میں خواتین کے ساتھ جو ہوا اس کی تحقیقات ہونی چاہئیں۔
