ہالی ووڈ اسٹوڈیو لائنزگیٹ نے مائیکل جیکسن کی زندگی پر مبنی بایوپک ’مائیکل‘ (Michael) کی پہلی باضابطہ جھلک جاری کر دی ہے، جس کے بعد فلم کو 2026 کی نمایاں ترین سوانحی ریلیزز میں شمار کیا جا رہا ہے۔
جاری کردہ خصوصی فیچرٹ میں مائیکل جیکسن کے بھتیجے جعفر جیکسن کو مرکزی کردار کی تیاری کرتے ہوئے دکھایا گیا ہے۔ ویڈیو میں ریہرسل کے مناظر شامل ہیں جہاں وہ کنگ آف پاپ کے شہرۂ آفاق ڈانس انداز کو سیکھتے اور اسے مؤثر انداز میں پیش کرنے کی کوشش کرتے نظر آتے ہیں۔
یہ بھی پڑھیں: موت کے 16 سال بعد بھی مقبولیت برقرار، مائیکل جیکسن سب سے زیادہ کمانے والے گلوکار قرار
پروڈکشن ٹیم کے مطابق فلم میں حقیقت پسندی کو یقینی بنانے کے لیے خصوصی محنت کی گئی ہے تاکہ مائیکل جیکسن کی فنکارانہ عظمت اور اسٹیج پرفارمنس کو مستند انداز میں پیش کیا جا سکے۔
جعفر جیکسن نے اپنے بیان میں کہا کہ انہیں فلم کے سیٹ پر ہر روز مائیکل جیکسن کے لیے محبت اور احترام کا احساس ہوا۔ ان کی بطور مرکزی کردار کاسٹنگ کو غیر معمولی توجہ حاصل ہوئی ہے خصوصاً اس وجہ سے کہ وہ مائیکل جیکسن کے قریبی رشتہ دار ہیں۔
یہ بھی پڑھیں: مائیکل جیکسن کی میلی جرابیں بھی نیلام ہوگئیں لیکن کتنے لاکھ میں؟
فلم میں مائیکل جیکسن کے فنی سفر کے اہم مراحل کو اجاگر کیا جائے گا جن میں ان کی ابتدائی زندگی، عالمی شہرت تک رسائی اور موسیقی کی دنیا پر ان کے گہرے ثقافتی اثرات شامل ہیں۔ اگرچہ تاحال مکمل ٹریلر جاری نہیں کیا گیا تاہم تازہ فیچرٹ اس بات کی نشاندہی کرتا ہے کہ فلم کی تشہیری مہم تیز کر دی گئی ہے۔
فلم کی تیاری کا آغاز نومبر 2019 میں ہوا جب پروڈیوسر گراہم کنگ نے مائیکل جیکسن کی زندگی پر فلم بنانے کے حقوق حاصل کیے۔ اسکرین پلے جان لوگن نے تحریر کیا ہے۔ فروری 2022 میں لائنزگیٹ نے باضابطہ طور پر فلم کا اعلان کیا جبکہ جنوری 2023 میں انتون فوکوا کو ہدایتکاری کی ذمہ داری سونپی گئی۔
یہ بھی پڑھیں: ’لوگ چاہتے ہیں بابر اعظم ڈانس کرے تو مائیکل جیکسن اورگانا گائے تو نور جہاں لگے‘
کاسٹنگ کا عمل 2023 میں شروع ہوا اور جنوری سے اپریل 2024 تک جاری رہا۔ جنوری 2024 میں نووارد اداکار جولیانو کریو والدی کو کم عمر مائیکل کے کردار کے لیے منتخب کیا گیا جبکہ کولمین ڈومنگو جو جیکسن اور نیا لانگ کیتھرین جیکسن کا کردار ادا کریں گی۔
فروری میں مائلز ٹیلر کو جان برانکا کے کردار کے لیے کاسٹ کیے جانے کی تصدیق ہوئی جب کہ جیکسن فائیو کے دیگر اراکین کی کاسٹنگ کا اعلان بھی اسی عرصے میں کیا گیا۔ فلم کی شوٹنگ جنوری 2024 میں شروع ہوئی جو 2023 کی SAG-AFTRA ہڑتال کے باعث تاخیر کا شکار ہوئی تھی اور مئی 2024 میں مکمل ہوئی۔ اضافی عکسبندی جون 2025 میں کی گئی۔
یہ بھی پڑھیں: شادی میں ڈانس کرتی لڑکی کو دل کا جان لیوا دورہ، ویڈیو وائرل ہوگئی
’مائیکل‘ امریکا میں 24 اپریل 2026 کو لائنزگیٹ کے تحت جبکہ بین الاقوامی سطح پر یونیورسل پکچرز کے ذریعے ریلیز کی جائے گی۔ جاپان میں فلم کی تقسیم کے حقوق کینو فلمز کے پاس ہیں۔
یاد رہے کہ مائیکل جیکسن پر آخری بڑی تھیٹر ریلیز 2009 کی دستاویزی فلم ’مائیکل جیکسنز دیس از اٹ‘ تھی تاہم نئی بایوپک ان کی زندگی اور کیریئر کو ڈرامائی انداز میں پیش کرے گی جس کا شائقین کو بے صبری سے انتظار ہے۔
