بنگلہ دیش: این سی پی کا بھی نتائج میں رد و بدل کا الزام، الیکشن کمیشن سے نظرثانی کا مطالبہ

شیخ حسینہ واجد کا تختہ الٹنے والے نوجوانوں کی جماعت نیشنل سٹیزن پارٹی (این سی پی) نے متعدد حلقوں میں ووٹوں کی گنتی میں بڑے پیمانے پر تضادات کا الزام عائد کرتے ہوئے الیکشن کمیشن آف بنگلہ دیش سے مطالبہ کیا ہے کہ حتمی نتائج جاری کرنے سے قبل متنازع نشستوں کا ازسرِنو جائزہ لیا جائے۔

’11 جماعتی اتحاد کے سرکردہ امیدواروں کو نشانہ بنایا جا رہا ہے‘

این سی پی کے ترجمان آصف محمود شوجیب بھویائیں نے بنگلا موٹر میں قائم پارٹی کے عارضی مرکزی دفتر میں رات تقریباً 2 بجے ہنگامی پریس کانفرنس کرتے ہوئے کہا کہ انہیں واضح شواہد ملے ہیں کہ نتائج میں مبینہ رد و بدل کیا جا رہا ہے، جس کا مقصد 11 جماعتی اتحاد کے اہم امیدواروں کو نقصان پہنچانا ہے۔

انہوں نے دعویٰ کیا کہ مختلف حلقوں میں میڈیا کی جانب سے جاری کردہ اعداد و شمار، پولنگ اسٹیشنز کی سطح پر ووٹوں کی گنتی اور ریٹرننگ افسران کے اعلانات میں واضح فرق پایا گیا۔

ڈھاکہ کی 5 نشستوں میں بے ضابطگیوں کا دعویٰ

آصف محمود نے ڈھاکہ 13، ڈھاکہ 15، ڈھاکہ 17، ڈھاکہ 19 اور ڈھاکہ 11 کی نشستوں میں مبینہ بے ضابطگیوں کا الزام لگایا۔ ان کے مطابق بعض مقامات پر مکمل ووٹوں کی گنتی سے قبل ہی کامیاب امیدواروں کا اعلان کر دیا گیا، جبکہ کچھ حلقوں میں انفرادی پولنگ اسٹیشنز کے نتائج بعد میں تبدیل کیے گئے۔

یہ بھی پڑھیے بنگلہ دیش جماعتِ اسلامی نے  انتخابی نتائج  کی شفافیت پر  سنگین سوالات اٹھا دیے

انہوں نے مزید کہا کہ کُری گرام 1 اور کُری گرام 2 میں غیر سرکاری فتح کے اعلانات کے بعد بے چینی اور دباؤ کی صورتحال پیدا ہوئی۔

بیلٹ پیپرز اور مبینہ فون کال کا معاملہ

ڈھاکہ 8 کے حوالے سے انہوں نے الزام عائد کیا کہ مخصوص خانے سے باہر مہر لگے بیلٹ پیپرز کو بھی گنتی میں شامل کیا گیا۔

آصف محمود کے مطابق ایک مخالف امیدوار کے قریبی رشتہ دار کی مبینہ ریکارڈ شدہ فون کال میں نتائج پر اثرانداز ہونے کے لیے رابطوں کا ذکر کیا گیا، جسے انہوں نے ’ناصرالدین پٹواری( این سی پی کے امیدوار) کو ہرانے کی مکمل سازش‘ قرار دیا۔

مختلف ذرائع سے مختلف نتائج؟

این سی پی ترجمان کا کہنا تھا کہ ایک پریزائیڈنگ افسر نے پارٹی نمائندوں کو بتایا کہ بعض ہدایات الیکشن کمیشن کی جانب سے آئی تھیں۔
انہوں نے کہا کہ میڈیا میں ایک نتیجہ آ رہا تھا، پولنگ مراکز سے دوسرا، مجموعی اعداد و شمار کچھ اور ظاہر کر رہے تھے، جبکہ ریٹرننگ افسر نے مختلف ہندسہ جاری کیا۔

ان کے مطابق ابتدائی طور پر فتح کے اعلانات نفسیاتی دباؤ پیدا کرنے کے لیے کیے جا رہے ہیں، حالانکہ زمینی اور حقیقی ووٹوں کی گنتی کی صورتحال مختلف ہے۔

یہ بھی پڑھیے بنگلہ دیش عام انتخابات 2026: کتنی خواتین کو کامیابی ملی؟

آصف محمود نے الیکشن کمیشن سے مطالبہ کیا کہ حتمی نتائج جاری کرنے سے قبل متنازع حلقوں کا مکمل جائزہ لیا جائے اور جہاں ضرورت ہو وہاں ووٹوں کی دوبارہ تصدیق (ری ویریفکیشن) کا حکم دیا جائے۔

بنگلہ دیش جماعتِ اسلامی نے  انتخابی نتائج  کی شفافیت پر  سنگین سوالات اٹھا دیے

واضح رہے کہ اس سے قبل  بنگلہ دیش جماعتِ اسلامی نے بھی قومی انتخابات کے نتائج کے عمل کی شفافیت پر سوالات اٹھاتے ہوئے کہا ہے کہ وہ ’ انتخابی نتائج کے گرد عمل سے مطمئن نہیں ‘۔

پارٹی کے بیان میں کہا گیا کہ 11 جماعتی اتحاد کے امیدوار مختلف حلقوں میں معمولی اور مشکوک فرق سے ہارے۔ جماعت کے مطابق غیر سرکاری نتائج کے اعلانات میں بار بار تضادات اور مبینہ من گھڑت اعداد و شمار سامنے آئے۔

ٹرن آؤٹ کی شرح جاری نہ کرنے پر اعتراض

بیان میں مزید کہا گیا کہ الیکشن کمیشن آف بنگلہ دیش کی جانب سے ووٹر ٹرن آؤٹ کی شرح جاری نہ کرنے سے بھی شکوک و شبہات پیدا ہوئے۔

یہ بھی پڑھیے تاریخی انتخابی مرحلہ مکمل، بنگلہ دیش میں بی این پی دو تہائی اکثریت کے قریب

جماعتِ اسلامی نے الزام عائد کیا کہ انتظامیہ کے ایک حصے نے مبینہ طور پر ایک بڑی سیاسی جماعت کی جانب جھکاؤ کا مظاہرہ کیا، جس سے نتائج کے عمل کی دیانتداری پر سنگین سوالات اٹھتے ہیں۔

کارکنوں کو صبر کی تلقین

جماعتِ اسلامی نے اپنے کارکنوں اور حامیوں سے اپیل کی کہ وہ صبر کا مظاہرہ کریں اور 11 جماعتی اتحاد کے آئندہ لائحہ عمل کا انتظار کریں۔ پارٹی نے کہا کہ اتحاد کی جانب سے جاری کیے جانے والے سرکاری پروگرام کے مطابق آئندہ کا راستہ اختیار کیا جائے گا۔