ٹی ٹوئنٹی ورلڈ کپ 2026 میں روایتی حریف بھارت اور پاکستان کے درمیان بڑا مقابلہ کل کولمبو میں ہو گا۔ میچ آر پریماداسا اسٹیڈیم میں ہوگا اور شائقین کو ایک سنسنی خیز مقابلے کی توقع ہے۔
یہ بھی پڑھیں:ٹی20 ورلڈ کپ: آئر لینڈ نے عمان کو 96 رنز سے شکست دے دی
بھارت نے اپنے پہلے میچ میں امریکا کو شکست دی اور پھر نمیبیا کو 93 رنز سے ہرایا۔ دوسری جانب پاکستان نے نیدرلینڈز کے خلاف سنسنی خیز مقابلے کے بعد کامیابی حاصل کی اور اس کے بعد امریکا کے خلاف بھی عمدہ کھیل پیش کیا۔ دونوں ٹیمیں اچھے اعتماد کے ساتھ میدان میں اتریں گی۔
ماضی کا ریکارڈ کس کے حق میں؟
ٹی ٹوئنٹی ورلڈ کپ میں اب تک بھارت اور پاکستان آٹھ بار مدِ مقابل آ چکے ہیں۔ ان میں سے سات میچ بھارت نے جیتے جبکہ پاکستان صرف ایک بار، سن 2021 میں کامیاب ہوا۔
اگر مجموعی ٹی ٹوئنٹی مقابلوں کی بات کی جائے تو دونوں ٹیموں کے درمیان 16 میچز کھیلے جا چکے ہیں۔ بھارت نے 13 جبکہ پاکستان نے 3 میچز میں کامیابی حاصل کی۔
کولمبو میں بھارت کا مضبوط ریکارڈ
آر پریماداسا اسٹیڈیم میں بھارت کا ریکارڈ خاصا مضبوط ہے۔ سن 2009 کے بعد بھارت نے یہاں 15 ٹی ٹوئنٹی میچ کھیلے جن میں سے 11 میں فتح حاصل کی اور صرف 4 میں شکست ہوئی۔
بارش کا خدشہ
میچ کے دوران بارش کا امکان بھی ظاہر کیا گیا ہے۔ دن کے وقت بارش کے امکانات زیادہ بتائے جا رہے ہیں جبکہ شام کے وقت یہ امکانات کم ہو سکتے ہیں، تاہم آسمان پر بادل چھائے رہنے کی پیشگوئی ہے۔
یہ بھی پڑھیں:ٹی 20 ورلڈ کپ: کراچی میں پاکستان بھارت میچ کے لیے کن مقامات پر اسکرینیں لگائی جائیں گی؟
میچ اتوار 15 فروری کو شام 5 بج کر 30 منٹ پر کھیلا جائے گا۔
شائقین کرکٹ اس بڑے مقابلے کا بے صبری سے انتظار کر رہے ہیں اور امید کی جا رہی ہے کہ دونوں ٹیمیں بھرپور اور دلچسپ کھیل پیش کریں گی۔
