معروف بالی وڈ سپر اسٹار گووندا کی اہلیہ سنیتا آہوجا نے کہا ہے کہ وہ اداکار کو ایک ہی شرط پر معاف کریں گی جب وہ اپنی زندگی ان اصولوں کے مطابق گزاریں گے جنہیں وہ درست سمجھتی ہیں۔
گزشتہ چند ماہ سے گووندا بے وفائی اور ایک کم عمر اداکارہ کے ساتھ تعلق کی خبروں کے باعث میڈیا کی توجہ کا مرکز بنے ہوئے ہیں۔ ان افواہوں کو اس وقت مزید تقویت ملی جب سنیتا آہوجا نے بھی ایک بیان میں کہا کہ انہوں نے شوہر کے تعلق کے بارے میں سنا ہے۔
یہ بھی پڑھیں: اداکار گووندا مشکل میں، بیوی سنیتا آہوجا کا بے وفائی اور ظلم کرنے کا الزام
انہوں نے بعض مواقع پر یہ بھی کہا کہ فلمی صنعت میں نئے آنے والے افراد اکثر کسی ’شوگر ڈیڈی‘ کی تلاش میں ہوتے ہیں۔ دوسری جانب گووندا نے حالیہ انٹرویو میں ان تمام خبروں کو بے بنیاد اور من گھڑت قرار دیا۔ تاہم اب سنیتا آہوجا نے اپنے تازہ وی لاگ میں اس معاملے پر دوبارہ گفتگو کرتے ہوئے اپنے مؤقف کی وضاحت کی ہے۔
سنیتا آہوجا کا کہنا تھا کہ ’وہ میری بچپن کی محبت ہیں۔ اگر وہ خود میں تبدیلی لائیں اور اس طریقے سے زندگی گزاریں جسے میں درست سمجھتی ہوں تو میں انہیں معاف کر سکتی ہوں‘۔ انہوں نے مزید کہا کہ وہ میڈیا میں گردش کرنے والی خبروں سے ذہنی دباؤ کا شکار ہیں۔
یہ بھی پڑھیں: ’وہ کسی اور کا ہوگا تو قیامت ہوگی‘، گرل فرینڈ کی شادی کسی اور سے طے پانے پر باڈی بلڈر عاشق نے خود کشی کرلی
ان کے مطابق ’یہ وہ عمر نہیں ہے کہ میں اس قسم کا تناؤ برداشت کر سکوں۔ میں اس وقت مینوپاز کے مرحلے سے گزر رہی ہوں اور ایسے وقت میں شوہر اور بچوں کی حمایت درکار ہوتی ہے نہ کہ مزید دباؤ‘۔
واضح رہے کہ اس معاملے پر تاحال گووندا کی جانب سے مزید کوئی باضابطہ بیان سامنے نہیں آیا۔
