کراچی کے علاقے سولجر بازار میں مبینہ گیس دھماکے کے باعث ایک رہائشی عمارت کا حصہ گر گیا، جس کے نتیجے میں کم از کم 13 افراد جاں بحق اور 14زخمی ہو گئے۔
جاں بحق ہونے والوں میں 3 خواتین اور 4 بچے بھی شامل ہیں۔
یہ افسوسناک واقعہ سولجر بازار کے علاقے گل رعنا کالونی میں پیش آیا، جہاں ایک رہائشی مکان میں دھماکے کے بعد عمارت کا کچھ حصہ زمین بوس ہو گیا۔
ڈسٹرکٹ ایسٹ پولیس کے ترجمان کے مطابق ابتدائی اطلاعات سے ظاہر ہوتا ہے کہ واقعہ گیس لیک ہونے کے باعث پیش آیا۔
ڈی سی ایسٹ کے مطابق عمارت 40سے 50گز کے رقبے پر بنائی گئی تھی، سلنڈر دھماکے کی شدت سے عمارت متاثر ہوئی اور زمین بوس ہوگئی۔
ڈی جی ریسکیو 1122بریگیڈیئر واجد کے مطابق آلات کی مدد سے لوہے کو کاٹ کر ملبے میں موجود افراد کو نکالا گیا۔ دھماکا پہلے فلور پر گیس سلنڈرپھٹنے سے ہوا۔ تنگ گلیاں ہونے کی وجہ سے ریسکیو آپریشن میں مشکلات پیش آئیں۔ ملبے تلے مزید افراد کے ہونے کے خدشے کے باعث ریسکیو اینڈ سرچ آپریشن جاری ہے۔
پولیس اور قانون نافذ کرنے والے اداروں کی کارروائی
پولیس ترجمان کے مطابق واقعے کی اطلاع ملتے ہی قانون نافذ کرنے والے اداروں کی بڑی نفری موقع پر پہنچ گئی تھی۔ پولیس نے علاقے کو گھیرے میں لے کر سیکیورٹی سخت کر دی ہے جبکہ امدادی اداروں نے فوری طور پر ریسکیو آپریشن شروع کر دیا۔
زخمیوں کی حالت
زخمی ہونے والے 11 افراد کو فوری طور پر قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔ بعض زخمیوں کی حالت تشویشناک بتائی جا رہی ہے۔
حکام کے مطابق واقعے کی مکمل تحقیقات شروع کر دی گئی ہیں تاکہ دھماکے کی اصل وجہ اور ذمہ داروں کا تعین کیا جا سکے۔
