پاکستان تحریک انصاف کے سینیئر رہنما تیمور سلیم جھگڑا نے حکومت کی جانب سے معیشت بہتر کرنے کے دعوؤں کو بے بنیاد قرار دیتے ہوئے کہا ہے کہ حکومت کے پاس ملک کی اقتصادی صورتحال کو سنبھالنے کا کوئی مؤثر نسخہ موجود نہیں۔
میڈیا سے گفتگو کرتے ہوئے تیمور جھگڑا نے کہاکہ حالیہ قومی اعداد و شمار تشویشناک ہیں۔ 2018 میں ملک کی 22 فیصد آبادی غربت کی لکیر سے نیچے تھی، جو اب بڑھ کر 29 فیصد تک پہنچ گئی ہے۔
مزید پڑھیں: مصطفیٰ نواز کھوکھر کا عمران خان کو علاج کے لیے اسپتال منتقل کرنے کا مطالبہ
انہوں نے کہاکہ پچھلے 11 برسوں میں نہ صرف غربت کی شرح میں اضافہ ہوا بلکہ غریب و امیر کے درمیان فرق بھی 32.7 فیصد تک جا پہنچا ہے۔ پنجاب اور سندھ میں غربت میں سب سے زیادہ اضافہ دیکھنے میں آیا ہے، جہاں پنجاب میں یہ شرح 41 فیصد اور سندھ میں 33 فیصد تک پہنچ گئی۔
انہوں نے کہا کہ حکومت نے حال ہی میں بیروزگاری کی رپورٹ جاری کی، جو گزشتہ 21 برسوں میں سب سے زیادہ ہے۔
انہوں نے تنقید کرتے ہوئے کہاکہ حکومت نے 10 ارب روپے میں پی آئی اے کو فروخت کیا اور اسی رقم میں ایک نجی جیٹ خرید لیا، جس پر کسی نے بھی جواب نہیں دیا۔
تیمور جھگڑا نے کہاکہ پنجاب حکومت بھی پرائیویٹ جیٹ اور دیگر مراعات کے حوالے سے جواب دینے سے گریز کر رہی ہے۔
انہوں نے بتایا کہ پنجاب کے آئی جی اور چیف سیکریٹری کو خصوصی مراعات دی گئی ہیں اور انہیں 4500 سی سی کی گاڑیاں فراہم کی گئی ہیں۔
تیمور جھگڑا نے کہاکہ پنجاب کے سرکاری ملازمین کو 11 کروڑ روپے کی گاڑیاں دی گئی ہیں۔
مزید پڑھیں: معیشت استحکام کی جانب گامزن، حکومت ہر فرد کو نوکری نہیں دے سکتی، وزیر خزانہ
تیمور جھگڑا نے زور دے کر کہا کہ حکومت کو غربت، روزگار اور شہری تحفظ کے معاملے پر شفاف اور فوری جواب دینا ہوگا، کیونکہ عوام کے مسائل نظر انداز نہیں کیے جا سکتے۔
