وفاقی وزیر خزانہ محمد اورنگزیب نے کہا ہے کہ حکومت 24 کروڑ افراد کو نوکریاں فراہم نہیں کر سکتی، معیشت استحکام کی جانب گامزن ہے۔
انہوں نے یہ بات لاہور میں فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) میں پاکستان اکنامک گروتھ کانفرنس سے خطاب کرتے ہوئے کہی۔
مزید پڑھیں: پی آئی اے کی نجکاری ملکی معیشت پر بڑھتا ہوا اعتماد ہے، خواجہ آصف کا اظہار اطمینان
وزیر خزانہ نے کہاکہ معیشت میں استحکام ہے اور زرمبادلہ کے ذخائر میں مسلسل اضافہ ہو رہا ہے۔ تعمیراتی شعبے میں کام جاری ہے اور ٹیکس نیٹ کو وسیع کرنے کی کوششیں کی جا رہی ہیں۔
انہوں نے کہاکہ معیشت کی ڈیجیٹلائزیشن سے شفافیت بڑھے گی اور محصولات میں اضافہ ہوگا۔
محمد اورنگزیب نے مزید کہاکہ سیمنٹ کی پیداوار میں اضافہ ہو رہا ہے اور تعمیراتی شعبے پر ٹیکس بھی بڑھ رہا ہے۔ ’پاکستان کی آئی ٹی برآمدات 10 ملین ڈالر تک پہنچ چکی ہیں، تاہم کچھ رقوم ہنڈی کے ذریعے بیرون ملک منتقل ہو رہی ہیں۔‘
وزیر خزانہ نے ریئل اسٹیٹ اور تعمیراتی شعبے کے تعلقات پر بھی بات کی اور کہاکہ تعمیراتی سیکٹر دیگر شعبوں سے جڑا ہوا ہے۔ انہوں نے یقین دہانی کرائی کہ جہاں بھی مسائل ہوں گے، انہیں حل کیا جائے گا۔
انہوں نے ٹیکسٹائل سیکٹر پر بھی روشنی ڈالی اور کہاکہ اس شعبے کے مسائل جلد حل کیے جائیں گے، تاہم اس کے لیے 10 سے 12 دن درکار ہیں۔
مزید پڑھیں: ملکی معیشت کے لیے اچھی خبر، پاکستان اور آئی ایم ایف کے درمیان اسٹاف لیول معاہدہ طے پا گیا
وزیر خزانہ نے پراپرٹی سیکٹر کے متعدد ٹیکسوں کی شرح میں کمی پر غور کرنے کا بھی اعلان کیا اور کہا کہ مختلف شعبوں کے مسائل کے ساتھ فنانس کے توازن کو بھی مدنظر رکھا جائے گا۔
