بھارت نے ایران میں موجود اپنے شہریوں کو موجودہ حالات کے باعث فوری طور پر وطن واپسی کی ہدایت جاری کردی ہے۔
یہ فیصلہ ایران اور امریکا کے درمیان بڑھتی ہوئی کشیدگی اور ممکنہ امریکی کارروائی کے خدشات کے تناظر میں کیا گیا ہے۔
مزید پڑھیں: ایران امریکا مذاکرات میں مثبت پیشرفت، معاہدے کے لیے رہنما اصولوں پر اتفاق
تہران میں بھارتی سفارتخانے کی جانب سے جاری بیان میں کہا گیا ہے کہ جو بھارتی شہری اس وقت ایران میں مقیم ہیں وہ دستیاب ذرائع، خصوصاً کمرشل پروازوں کے ذریعے جلد از جلد ملک چھوڑ دیں۔
سفارتخانے نے بدلتی ہوئی صورتحال کو مدنظر رکھتے ہوئے احتیاطی تدابیر اختیار کرنے پر زور دیا ہے۔
حکام کے اندازے کے مطابق ایران میں عموماً قریباً 10 ہزار بھارتی شہری موجود ہوتے ہیں۔
بیان میں شہریوں کو ہدایت کی گئی ہے کہ وہ احتجاجی مقامات سے دور رہیں، غیر ضروری نقل و حرکت سے گریز کریں، مقامی حکام کی ہدایات پر عمل کریں اور سفارتخانے سے مسلسل رابطے میں رہیں۔ اس کے ساتھ ساتھ مقامی میڈیا کے ذریعے حالات پر نظر رکھنے کی بھی تاکید کی گئی ہے۔
یہ انتباہ ایسے وقت میں سامنے آیا ہے جب بھارتی وزیرِاعظم نریندر مودی اسرائیل کے دورے پر روانہ ہونے والے ہیں۔
مزید پڑھیں: ایران امریکا کشیدگی کے باعث مشرقِ وسطیٰ کی پروازیں متاثر، عالمی ایئرلائنز الرٹ
اسرائیلی وزیرِ اعظم بنیامین نیتن یاہو کا کہنا ہے کہ یہ دورہ مبینہ طور پر شدت پسند عناصر کے خلاف تعاون کو مزید مضبوط بنانے میں مددگار ثابت ہو سکتا ہے۔
