بانی پی ٹی آئی عمران خان کی اسپتال منتقلی اور علاج سے متعلق سپریم کورٹ میں دائر کردہ درخواست میں انہیں فوری طور پر شفا اسپتال منتقل کرنے کی استدعا کی گئی ہے۔
درخواست بانی پی ٹی آئی کے وکلا لطیف کھوسہ، شہباز کھوسہ اور حمزہ ستار ایڈووکیٹس کی جانب سے دائر کی گئی ہے، جس میں عدالت عظمیٰ سے فوری سماعت اور احکامات جاری کرنے کی اپیل کی گئی ہے۔
یہ بھی پڑھیں: سپریم کورٹ: جیل میں تو آپ کے پاس آنکھ تک کا علاج نہیں، دل کا علاج کیا کریں گے، جسٹس عقیل عباسی
درخواست میں مؤقف اختیار کیا گیا ہے کہ بانی پی ٹی آئی کو فوری طبی معائنے اور مناسب علاج کی سہولت فراہم کی جائے۔
استدعا کی گئی ہے کہ انہیں شفا اسپتال منتقل کر کے ماہر امراض چشم کے ذریعے ان کی آنکھ کا تفصیلی معائنہ کروایا جائے۔
مزید پڑھیں: عمران خان کا علاج اور رسائی یقینی بنائی جائے، پی ٹی آئی رہنماؤں کی سپریم کورٹ سے باہر گفتگو
درخواست گزاروں نے عدالت سے یہ بھی استدعا کی ہے کہ بانی پی ٹی آئی کے ذاتی معالجین، ڈاکٹر فیصل سلطان اور عاصم یوسف کو رسائی فراہم کی جائے تاکہ وہ ان کی نگرانی میں طبی معائنہ اورعلاج کو یقینی بنا سکیں۔
درخواست میں مؤقف اپنایا گیا ہے کہ مریض کے اعتماد اور بہتر طبی دیکھ بھال کے لیے ان کے ذاتی معالجین کی نگرانی ناگزیر ہے۔
