پاکستانی سیاسی اُفق پر اس وقت ایسی پریس کانفرنسز کے بادل چھائے ہوئے ہیں، جن کا مشترک اسکرپٹ اس اظہار پر آگے بڑھتا ہے کہ ’اُس پر کوئی دباؤ نہیں‘ اور اس اعلان پر تمام ہوتا ہے کہ ’اب وہ تحریک انصاف کی کشتی کا سوار نہیں‘۔ عامر کیانی سے لیکر عمران اسماعیل تک ہر پریس کانفرنس اس ایک حقیقت کی ترجمان ہے۔
ایسے تمام مواقع پر جن میں تحریک انصاف کو خیر باد اور عمران خان کو خدا حافظ کہا گیا، ان پریس کانفرنسز نے زیادہ توجہ حاصل کی جن کے کرنے والے اس پریس کانفرنس سے پہلے سرکاری مہمان تھے۔
سنا ہے پرویز الہی بھی پریس کانفرنس کی تیاری رہے ہیں ۔۔۔۔۔
— Azaz Syed (@AzazSyed) May 31, 2023
مگر اب ایک ایسی پریس کانفرنس کی سرگوشیاں ہیں جس کا کرنے والا گجرات کا باسی اور ظہورالٰہی روڈ لاہور کا مکین ہے۔ جی ہاں! متوقع تقریب کے دُلہا چوہدری پرویز الٰہی ہیں جنہیں لاہور پولیس چاہ کر بھی تلاش نہ کر سکی، ان کے گھر پر مارے جانے والے چھاپے نامرادی اور ناکامی کا نشان بن گئے، مگر کب تک؟
ایسے وقت میں جب بدلتے موسموں کی دھوپ نے پرویز الٰہی پر بزرگی طاری کر دی ہے، اور انہیں جواں سال بیٹے کے سہارے کی ضرورت ہے، بیٹا سات سمندر دور سے عمران خان کے ساتھ ڈٹ کر کھڑے رہنے کی نوید سنا رہا ہے، اس عمران خان کے ساتھ کندھے سے کندھا ملائے رکھنے کا دعویٰ کر رہا ہے جو خود زمان پارک کا اسیر بن کر رہ گئے ہیں، کوئی دن نہیں جاتا کہ یہ خانہ بندی تمام ہو اڈیالہ کے در کُھل جائیں اور وہ شاخ ہی نہ رہے جس پر مونس الٰہی آشیانہ بنانے کے خواہاں ہیں۔
باخبر صحافی اعزازسید نے ٹوئٹ کیا کہ ’ سنا ہے پرویز الہی بھی پریس کانفرنس کی تیاری رہے ہیں‘ ۔۔۔ تو جواب میں مونس الٰہی نے ترنت ٹوئٹ کیا کہ:
’جیت ہوگی ہار ہوگی وہ بعد میں ہوگی
فی الحال وفا ہوگی، وفاداری ہوگی اور سرِ عام ہوگی‘
مونس الٰہی شاید بھول گئے کہ ظہور الٰہی کے خاندان میں وفا صرف اسٹیبلشمنٹ سے کی جاتی ہے، کوئی نواز شریف، کوئی جنرل مشرف اور کوئی عمران خان ان کے خاندان کی رگوں میں لہو کی طرح گردش کرتی اسٹیبلشمنٹ سے وفاداری کو چاہ کر بھی نہیں بدل سکتا۔
https://t.co/9qHOmzXKNp pic.twitter.com/o9QV387vnD
— Moonis Elahi (@MoonisElahi6) May 31, 2023
سو ایسے وقت میں جب اسٹیبلشمنٹ کے اشارہ ابرو پر خان کے کتنے ہی جانثاروں کو ’9 مئی‘ نگل گیا، تو گجرات کے ان چوہدریوں کی کیا جرأت کہ وہ اسٹیبلشمنٹ کے مرضی کے بغیر سانس بھی لے سکیں، رہی بات ننھے چوہدری کی تو اس پر ایک حکایات یاد آگئی۔
کہتے ہیں سرِآبجو ایک شیر پانی پی رہا تھا کہ ایک بلند چٹان پر موجود میمنہ بولا ’چچا جان کیا حال ہے؟‘
شیر مسکرایا اور بولا ’یہ حال تُو نہیں پوچھا رہا بلکہ بلندی پر موجود ہونے کی وجہ سے بچ نکلنے کا امکان ہے جو یوں ہم کلام ہے‘۔
سو یہی کچھ مونس الٰہی کے ساتھ ہے جو بوڑھے باپ کو مشکل میں چھوڑ کر گوشہ عافیت میں جا بیٹھے ہیں اور وہاں سے فرمان سنا رہے ہیں کہ:
’جیت ہوگی ہار ہوگی وہ بعد میں ہوگی
فی الحال وفا ہوگی، وفاداری ہوگی اور سرِ عام ہوگی‘
